По маратонските преговори, Меркел и Шулц постигнаа договор за формирање на влада


Берлин, 7 февруари, 2018 - 12:53 (META) 

Конзервативците на Ангела Меркел и социјалдемократите на Мартин Шулц, постигнаа договор за формирање на владејачка коалиција, јавуваат светските медиуми.

Според пишувањата на медиумите, социјалдемократите ќе го добијат министерството за надворешни работи и за финансии, што се оценува како добар преговор од страна на Шулц откако претходните осум години, ова министерство беше во рацете на Христијанско-демократската унија (ЦДУ). Новиот министер за финансии треба да биде градоначалникот на Хамбург, Олаф Шолц.

Маратонската рунда преговори помеѓу Меркел и Шулц почна од вчера претпладне кога требаше да биде и последниот ден за преговори помеѓу двете страни, почнат на почетокот на јануари. Последните спорни точки во преговорите, се однесувале на распределбата на министерските места, реформите во здравството и договорите за работа на неодредено време.

Договорот, треба да го одобрат околу 460.000 членови на Социјалдемократската партија (СПД) што може да трае и неколку недели.

Многу членови на таа партија се скептични кон новата коалиција со конзервативците. Ако членовите на оваа партија бидат против новата коалиција, Меркел ќе треба да избере или малцинска влада или нови избори.


Меркел подготвена на компромис со социјалдемократите


Берлин, 6 февруари, 2018 - 12:52 (META) 

Германската канцеларка Ангела Меркел денеска изјави дека е подготвена на компромис за постигнување на коалициски договор со социјалдемократите, пренесуваат агенциите.

Меркел рекла дека и понатаму има несогласувања околу суштинските прашања и дека секоја од страните „ќе мора да прифати болни компромиси“.

– Подготвена сум на компромис ако можеме да гарантираме дека на крајот ќе има повеќе корист отколку штети – изјавила Меркел.

Инаку, денеска во Берлин се очекува да завршат маратонските преговори меѓу конзервативците на Меркел и социјалдемократите за формирање на влада, четири месеци по парламентарните избори.

Претседателот на Социјалдемократската партија на Германија (СПД), Мартин Шулц рекол оти очекува денеска да биде постигнат договор.

Преговорите меѓу конзервативците и социјалдемократите за формирање на влада, по изборите на 24 септември, минатата година, се најдолги од Втората светска војна.

Партиите не можат да постигнат договор околу политиките за труд и здравствената заштита.


Шулц ги убеди Социјалдемократите да останат во владата на Меркел


Бон, 21 јануари, 2018 - 17:05 (META) 

Со тесно мнозинство Социјалдемократите денеска изгласаа партијата да влезе во коалиција со ЦДУ на Ангела Меркел. Лидерот на Социјалдемократската партијата Мартин Шулц успеа да ги убеди своите сопартијци кои со тесно мнозинство изгласаа партијата да влезе во коалиција со ЦДУ на канцеларката Ангела Меркел.

Шулц ги убеди 600-те делегати на партиската конвенција во Бон дека за Германија и за Европа е најдобро да нема политичка криза.

Шулц, кој и беше директен опонент на Меркел на изборите во септември, рече дека многу е направено во коалициските преговори и останува уште да се прецизира мигрантската политика. Социјалдемократите бараат од десничарите на Меркел да се ограничи слободниот влез во земјата на членови на семејствата на мигрантите кои добиле азил.

Доколку Шулц не беше успешен во убедувањето на неопределените сопартијци, Германија за прв пат по Втората светска војна ќе се соочеше со формирање малцинска влада. Второто сценарио беше предвремени избори, за што Марттин Шулц рече дека Социјалдемократите се неподготвени, по катастрофалните резултати на последните избори.

Десничарите на Меркел и Социјалдемократите се во коалициска влада од 2013 година .


Меркел и Шулц начелно се договорија за нова влада


Берлин, 12 јануари, 2018 - 10:42 (META) 

Конзервативците на германската канцеларка Ангела Меркел и социјалдемократите на Мартин Шулц утрово постигнале начелен договор за формирање на новата влада на Германија, јавуваат светските агенции, повикувајќи се на свои извори.

Компромисот бил постигнат по преговорите кои траеле повеќе од 24 часа.

Начелниот договор, според агенциите, во текот на денот треба да го потврдат управните одбори на Христијанско-демократската унија (ЦДУ) на Ангела Меркел и на Социјалдемократската партија (СПД).

Вчера беше последниот ден од преговорите зад затворени врати, на кои на маса требаше да бидат ставени чувствителните прашања, како мигрантската политика, здравството и финансиите.

Конзервативците и СПД заедно ја водеа Германија во два мандати во последните 12 години.


Се зголемува рејтингот на конзервативниот блок на Меркел и на социјалдемократите


Берлин, 26 ноември, 2017 - 20:03 (META) 

Рејтингот на конзервативниот блок на германската канцеларка Ангела Меркел и на Социјалдемократската партија на Германија (СПД) се зголемил за време на дискусијата за формирање нова голема коалиција, покажува анкетата што ја изврши агенцијата „Емнид“, по нарачка на „Билд ам зонтаг“.

Според резултатите, рејтингот на христијанско-демократскиот сојзу (ЦДУ) на Меркел и на христијанско-социјалниот сојуз (ЦСУ) на Хорст Зехофер се зголемил за 2 проценти во споредба со минатата недела и сега изнесува 33 проценти.

Поддршката за социјалдемократската партија, предводена од Мартин Шулц, се зголемила за еден процент и изнесува 22 проценти.

Рејтингот на крајно десничарската Алтернатива за Германија (АФД), според анкетата, паднал за 2 проценти и партијата сега има поддршка од 11 проценти. Тоа е најнискиот рејтинг за АФД од парламентарните избори, што се одржаа во септември, кога оваа партија освои 13 проценти од гласовите и стана трета по сила партија во Бундестагот.

Пад бележат и рејтинзите на либералната партија ФДП и партијата на зелените, откако минатата недела пропаднаа преговорите за формирање влада меѓу конзервативниот блок на Меркел и овие две партии. ФДП и партијата на зелените загубиле по еден процент од поддршката и сега имаат 10, односно 9 проценти.

Анкетата била спроведена на 1.225 граѓани на Германија со право на глас.


Меркел категорично против нови избори


Берлин, 25 ноември, 2017 - 22:25 (META) 

Германската канцеларка Ангела Меркел денеска изјави дека е категорично против предвремени парламентарни избори, по неуспехот да формира влада со либералната партија ФДП и со партијата на зелените.

– Апсолутно не сум убедена дека треба да ги повикаме граѓаните да гласаат повторно – изјави Меркел на конференција на нејзината Демохристијанска партија (ЦДУ), пренесуваат агенциите.

Таа истакна дека на Европа ѝ е потребна силна Германија и дека е пожелно бргу да се формира влада.

Меркел е подготвена да почне разговори со Социјалдемократската партија на Германија (СПД) за повторно формирање на голема коалиција.

Лидерот на социјалдемократите, Мартин Шулц, кој е под голем притисок да прифати нова коалиција со ЦДУ, заедно со Меркел и со лидерот на нејзината сестринска партија ЦСУ, Хорст Зехофер, в четврток треба да има заедничка средба со претседателот на Германија, Франк Валтер Штајнмаер.


На ЕУ ѝ е потребна силна германска влада, порача Јункер


Брисел, 25 септември, 2017 - 16:26 (META) 

Претседателот на Европската комисија, Жан-Клод Јункер, денеска порача дека на Европската Унија ѝ е потребна силна германска влада повеќе од кога и да е претходно, јавуваат агенциите.

„Претседателот Јункер е уверен, во светло на предизвиците со кои се соочени Европа и светот, дека на Европската Унија ѝ е потребна силна германска влада повеќе од кога и да е претходно“, изјавил портпаролот на Јункер, Маргаритис Шинас.

Инаку, Јункер денеска телефонски разговарал со канцеларката Ангела Меркел, чија партија (ЦДУ) победи на вчерашните парламентарни избори во Германија, но и со нејзиниот противкандидат од германската социјална демократска партија (СПД), Мартин Шулц.

Веднаш откако беа познати резлултатите од изборите, Шулц најави дека неговата партија нема повеќе да биде дел од големата коалиција со демохристијаните.

На вчерашните избори и ЦДУ и СПД остварија послаби резултати во однос на претходните избори во 2013 година. ЦДУ на Ангела Меркел ќе мора да преговара со либералите и со партијата на Зелените за составување на новата германска влада.


Мартин Шулц е избран за нов претседател на германските социјалдемократи


Берлин, 19 март, 2017 - 17:53 (META) 

Германската социјалдемократска партија (СПД) денеска одржа конвенција на која за нов претседател на партијата едногласно е избран поранешниот претседател на Европскиот парламент и актуелен кандидат за германски канцелар, Мартин Шулц, пренесува ХРТ.

Новиот претседател на СПД е сè поголема закана за Ангела Меркел, која сè до неодамна имаше отворен пат до нов мандат, но последните анкети покажуваат дека таа и Шулц се изедначени.

Шулц не ги крие своите амбиции да стане канцелар и да ја направи СПД најголема политичка сила во земјата.

Парламентарните избори во Германија се закажани наесен.


Ангела Меркел повторно ќе се кандидира за канцеларка


Берлин, 25 февруари, 2017 - 14:49 (META) 

Конзервативната Христијанско-демократска унија (ХДУ) денеска и официјално ја именуваше својата лидерка, Ангела Меркел, за кандидат на претстојните парламентарни избори во септември.

Меркел добила поддршка од 95 проценти од делегатите на конвенцијата на партијата во сојузната држава Мекленбург-Западна Померанија, која се смета за нејзина политичка база.

Истражувањето на јавното мислење покажува дека Социјалдемократската партија би можела да претставува голем предизвик за актуелната германска канцеларка.

Кандидат од оваа партија е Мартин Шулц, кој ќе ѝ биде противник на Меркел на парламентарните избори.


Штајнмаер: На светот му претстојат немирни времиња


Берлин, 22 јануари, 2017 - 18:12 (META) 

Германскиот министер за надворешни работи и најверојатно иден претседател на Германија, Франк Валтер Штајнмаер, во својот авторски напис објавен како воведник во неделното издание на весникот „Билд“, изборот на Доналд Трамп за нов претседател на САД го карактеризира како пресек во светската историја, пренесува ХРТ.

„Како и секогаш кога е во прашања примопредавањето на власта, постојат нејаснотии, двојби и непознаници околу насоките на новото водство. Но, во ова време на нов глобален неред, уште многу работи се на коцка. Со изборот на Доналд Трамп, стариот свет на 20 век дефинитивно е зад нас“, пишува Штајнмаер за „Билд“.

Сепак, Штајнмаер укажува и на тоа дека на власт во Вашингтон не стапува само Трамп, туку и неговиот тим.

„Ќе бидеме подготвени за дијалог и на новата администрација на САД ќе ѝ ги појасниме нашите ставови, вредности, но и интереси“, најавува Штајнмаер, изразувајќи оптимизам дека во Вашингтон и понатаму ќе има добар партнер.

„Се надевам дека во Вашингтон ќе наидеме на соговорници кои внимателно ќе слушаат, бидејќи и тие се свесни дека и на големите земји им требаат партнери“, заклучува Штајнмаер.

Изборот на Штајмаер за нов претседател на Германија е сè поизвесен бидејќи ја има поддршката на двете најголеми сили во т.н. Сојузно собрание, тело кое се состанува само за избор на претседател.

Неговото место на министер за надворешни работи, според последните информации, би требало да го преземе доскорешениот претседател на Европскиот парламент, Мартин Шулц.