УНИЦЕФ: Во Јемен страдале или биле повредени 5.000 деца


Сана, 16 јануари, 2018 - 20:38 (META) 

УНИЦЕФ соопшти дека како последица од војната во Јемен страдале или биле повредени околу 5.000 деца додека 1,8 милиони се прегладнети.

Во извештајот на УНИЦЕФ наведено е дека речиси два милиони деца не одат во училиште од почекот на конфликтот во Јемен кој изби во март 2015 година.

Речиси половина млади во таа земја немаат пристап до чиста вода за пиење додека на 400.000 од нив им е потребна итна помош.

Покрај конфликтот и гладот, Јемен го погодила и епидемија на колера од која се заболеле повеќе од милион луѓе, додека една четвртина инфицирани се деца под пет години.

Во граѓанската војна во Јемен од март 2015 година, загинаа околу 9.000 лица, неколку десетина илјади се ранети, а повеќе од 2,5 милиони се во бегство.


Најмалку 23 цивили загинале во воздушни напади во Јемен


Сана, 2 јануари, 2018 - 10:12 (META) 

Најмалку 23 цивили вчера загинале во бомбардирање на јеменскиот пристанишен град Ходеида, што го извршила коалцијата предводена од Саудиска Арабија, соопштиле безбедносни претставници на Јемен и очевидци, јавуваат светските агенции.

Според нивните тврдења во воздушните напади биле повредени осум луѓе.

Меѓународната организација за човекови права ја обвини арапската коалиција дека бомбардира места каде се собираат цивили – пазари, болници, станбени подрачја ширум Јемен, откако во 2015 година ја почна интервенцијата против Хутите.

Во граѓанската војна во Јемен досега загинаа повеќе од 10.000 цивили.


Во нападите на арапската коалиција во Јемен убиени 109 цивили, соопшти ОН


Женева, 28 декември, 2017 - 18:56 (META) 

Во воздушните напади на арапската коалиција предводена од Саудиска Арабија во Јемен загинале 109 цивили за десет дена, соопшти денеска координаторот на Обединетите нации (ОН) за хуманитарни прашања, Џејми Мекголдрик, јавуваат светските агенции.

Според него, меѓу жртвите се 54 лица кои биле убиени во воздушните напади на пазар во западната провинција Таиз, како и 14 лица од едно исто семејство убиени во напад на имот во провинцијата Ходеида.

Мекголдрик изјави дека ваквите инциденти покажуваат непочитување кон човечкиот живот и упати критики до сите страни во судирот, вклучително и до коалицијата предводена од Саудиска Арабија, кои како што рече продолжуваат со оваа апсурдна војна.

Арапската коалиција од март 2015 година бомбардира позиции на шиитските бунтовници во Јемен. Коалицијата го поддржува претседателот на Јемен, Абед Рабо Мансур Хади, кој беше принуден да побегне од земјата.

Во граѓанската војна во Јемен досега загинаа речиси 9.000 луѓе, десетици илјади се ранети, а повеќе од три милиони се бегалци. Здравствената и санитарната инфраструктура во земјата е речиси целосно уништена.

Јемен е погоден и од тешка хуманитарна криза, пред се поради недостиг на храна.


Во воздушни напади во Јемен, убиени 23 лица


Сана, 8 ноември, 2017 - 9:56 (META) 

Најмалку 23 лица загинаа во воздушните напади на коалицијата предводена од Саудиска Арабија во јеменската провинција Хаџа, соопштија јеменските власти.

Безбедносните и племенските претставници велат дека мета на нападот биле куќите на локалните шеици, кои ги посетил шефот на врховниот политички совет на бунтовниците Хути, Салех ел Самад. Меѓу убиените има жени и деца.

Саудиските медиуми јавуваат дека во нападите е убиен и Ел Самад, но портпаролот на бунтовниците Хути демантираше.

Провинцијата Хаџа е под контрола на бунтовниците.


Саудискиот принц Мохамед го обвини Иран за директна агресија


Ријад, 7 ноември, 2017 - 17:39 (META) 

Саудискиот принц престолонаследник Мохамед бин Саламан денеска изјави дека тоа што Иран ја снабдува јеменската милиција со ракети е акт на „директна воена агресија“.

Таа агресија, според него, би можела да биде „акт на војна“, пренесуваат денеска саудиските медиуми.

Изјавата на принцот доаѓа откако противвоздушната одбрана на Саудиска Арабија пресретнала и уништила ракета која на Ријад, наводно, ја испукала милицијата Хути, која контролира големи делови на соседен Јемен.

Официјален Техеран ги отфрли како „неодговорни и провокативни“ обвиненијата на Ријад дека се виновни за напад со балистичка ракета од Јемен.


Во воздушен напад во Јемен загинаа 29 цивили


Сана, 1 ноември, 2017 - 12:50 (META) 

Во воздушен напад на северот на Јемен загинаа 29 лица, а повредени се уште 17, соопштија извори блиски до шиитските бунтовници.

Агенцијата „Саба“, која ја контролираат бунтовниците, ја обвини Саудиска Арабија која ја предводи арапската коалиција против шиитите, дека е одговорна за бомбардирањето.

Според истиот извор, сите жртви се цивили, но болнички извори не ги потврдуваат информациите.

Во нападот е погоден пазар во местото Сахар, во провинцијата Саада, која е упориште на шиитските бунтовници.

Во Јемен војуваат меѓународно признаената влада и шиитските бунтовници, сојузници на поранешниот претседател Али Абдулах Салех, поддржуван од Иран.


Саудиски воен хеликоптер се урна во Јемен, 12 лица загинаа


Сана, 18 април, 2017 - 18:47 (META) 

Најмалку 12 лица загинаа при уривање на саудиски воен хеликоптер во Јемен, јави саудиската новинска агенција СПА.

Сè уште се истражува причината за падот на хеликоптерот, кој се урна во покраината Мариб, источно од Сана.

Ова е една од најголемите човечки загуби на саудиските сили во поединечен инцидент откако коалицијата на арапски држави поведе воени операции против движењето Хути во 2015 година, во обид да го врати на власт претседателот Абдурабу Манус Хади.


Повеќе од 40 сомалиски мигранти убиени во близина на брегот на Јемен


Сана, 18 март, 2017 - 10:57 (META) 

Повеќе од 40 сомалиски мигранти, меѓу кои имало жени и деца, биле убиени ноќеска во близина на брегот на Јемен, додека биле превезувани со чамец, јавуваат светските агенции.

Чамецот, со околу 140 мигранти од Сомалија, бил погоден од лесно оружје во близина на пристанишниот град Ходеда, на западниот брег на Јемен, соопштила канцеларијата за бегалци на Обединетите нации (УНХЦР). Чамецот, и покрај нападот, успеал да доплови до пристаништето, кое е под контрола на бунтовниците Хути.

Засега никој не ја презел одговорноста за нападот. Бунтовниците за нападот ја обвинуваат арапската коалиција, која, пак, ги отфрла ваквите наводи.

Во чамецот, како што објави Меѓународната организација за миграција (ИОМ) во Јемен, биле пронајдени телата на 42 лица.

Според управата на пристаништето, преживеаните мигранти заедно со тројца јеменски шверцери биле уапсени.


Осум загинати во самоубиствен напад во Јемен


Сана, 24 февруари, 2017 - 12:18 (META) 

Најмалку осум јеменски војници загинаа, а 10 се повредени во самоубиствен напад во јеменскиот град Зинџибар, соопштија локалните власти.

Нападот бил изведен од бомбаш самоубец облечен во униформа. Тој го активирал автомобилот бомба пред влезот на воениот камп.

Се претпоставува дека напаѓачот е член на Ал каеда.


Осум жени и едно дете убиени во воздушен напад кај Сана


Сана, 16 февруари, 2017 - 10:57 (META) 

Најмалку осум жени и едно дете се убиени синоќа за време на воздушен напад извршен во селото Шарах, кое се наоѓа на 40 километри од јеменскиот главен град Сана.

Како што соопштија медицински извори, нападот бил изведен во зона под контрола на бунтовниците.

Шиитските бунтовници Хути, кои го држат под контрола главниот град Сана и поголем дел од северен Јемен, ја обвинија арапската коалиција предводена од Саудиска Арабија, се одговорни за нападот во кој се ранети уште 10 жени.

Портпаролот на арапската коалиција засега не ги коментира ваквите обвинувања.

Пробунтовничката новинска агенција „Саба“, соопшти дека нападот бил насочен врз куќата на Мохамед ал Наки, во која се одржувал помен.