Во Охрид и Струга нема аптека со 24-часовно работно време и дежурни матични лекари


Охрид, 10 октомври, 2018 - 14:40 (META) 

Во Охрид и Струга каде што нема аптека со 24-часовно работно време, Приватните здравствени установи аптеки, кои имаат склучено договор со Фондот за здравствено осигурување спроведуваат дежурства на повик или состојба на готовност. Граѓаните реагираат дека ваквата состојба за нив претставува проблем, зошто понекогаш се приморани да чекаат до наредниот ден. Тие велат дека и туристите имаат потреба аптеките да работат цела вечер.

Во Охрид и Струга слична е ситуацијата и со матични лекари во вечерните часови и за време на викендите, бидејќи нема дежурни матични лекари. Поради тоа, итните случаи се препраќаат во градските болници, а најтешко е со болните деца.

– Јас ги жалам колегите кои се на детско одделение. Дали да ги гледаат тешките деца кои се болни и кои сакаат интензивен надзор или да решаваат проблем со пациент со дијареа. Се знае како се решава таа работа. Треба да има еден посебен оддел кој ќе биде како дежурна педијатриска амбуланта  –  изјави Никола Филев, лекар по семејна медицина од Охрид.

И матичните лекари велат дека фармацевтите и институциите мора да најдат начин како да го решат овој проблем, во интерес на пациентите.

„Навистина во лето има потреба од дежурна аптека, барем тоа да биде аптеката која работи во состав на Медицинскиот центар во Струга. Не можам да навлезам во тоа, како ќе го изведат“, рече Хаџер Алиед, лекар по семејна медицина.

Иако во минатото и во Охрид и во Струга имаше дежурни аптеки, во 2013 година, ФЗОМ донесе одлука за градовите кои имаат помалку од 15 аптеки и помалку од 30.000 жители, да има обезбедено дежурна аптека која ќе биде достапна на повик, а информациите на кој телефон ќе може да се повика аптеката во овие градови ќе ја има на веб-страницата на Фондот, како и во дежурните служби.


ФЗОМ ќе ги зголеми квотите на лекови во аптеките за овој месец


Скопје, 16 март, 2018 - 13:30 (META) 

Фондот за здравствено осигурување на Македонија (ФЗОМ) одлучи да ги зголеми квотите на лекови за овој месец во износ од 15 милиони денари кои ќе бидат линеарно распределени по аптеките, рече денеска на прес-конференција директорот на ФЗОМ, Ден Дончев.

Тој додаде дека вкупниот буџет за лекови за годинава ќе се зголеми во износ од 100 милиони денари годишно, ќе има ревизија на Правилникот и методологијата на распределба на финансиските средства, квотите и надоместоците на аптеките.

Дончев најави и нова поправична и поефикасна распределба на квотите на аптеките и поефикасен систем за нивни надоместоци.

Во долгорочните мерки рече дека се предвидува разгледување на можностите за воведување интегриран и ефикасен електронски систем преку вклучување на сите институции и здравствени установи и работници од здравствениот систем со воведување електронско здравствено досие по пациент.


Владата ќе го раскинува договорот за Казандол оти рудникот не е подготвен за производство


Скопје, 14 март, 2018 - 12:33 (META) 

Работната група формирана од Владата за рудникот Казандол, утврдила низа неправилности на терен, а правната основа за раскинување на договорот ќе се знае по седум дена откако Министерството за економија треба да ги потврди овие наоди, информираше денеска портпаролот на Владата, Миле Бошњаковски на редовната прес-конференција.

– Полињата за наводнување, оросување не се оформени, од системот за лужење не е изградено хавариското езеро, производствениот погон е во фаза на градба со целосно завршени бетонски работи, делумно поставена метална конструкција, но во халата нема уреди, машини, постројки инсталации со кои може да се врши производство. Пробиени се речиси сите рокови – рече Бошњаковски.

За рудникот Иловица, тој додаде дека работната група ги прави потребните анализи и кога ќе имаат конкретни информации, прашањето ќе биде ставено на владина седница.

На новинарско прашање за недостатокот на лекови до 15 во месецот, Бошњаковски објасни дека тоа се случува во нeколку аптеки и станува збор за сезонски ефект, односно кога во одреден период од годината, побарувачката за одредени лекови е поголема.

На денешната прес-конференција присуствуваше и заменик-министерот за правда, Оливер Ристовски кој ги објасни измените на законите за судовите и за судскиот совет, со кои, како што рече, се зајакнува квалитативниот критериум во оценувањето на судиите и претседателите на судовите во однос на квантитативниот.

На почетокот на прес-конфренцијата, Бошњаковски информираше дека се укинува досегашната практика на сајтот на владата пред седниците да се објавува дневниот ред и сите точки кои би биле разгледувани. Тоа од сега ќе се прави во текот на седницата кога дневниот ред ќе биде усвоен.


Притворен разбојник што ограбил девет аптеки во Скопје


Скопје, 20 јули, 2017 - 12:52 (META) 

Основното јавно обвинителство Скопје отвори истражна постапка против против едно лице кое се товари дека извршило девет разбојништва во исто толку аптеки во Скопје.

Како што соопшти денеска обвинителството, осомничениот, кој е на 44-годишна возраст, разбојништвата ги извршил во периодот од 23 јуни до 18 јули, заканувајќи се со пиштол кон вработените во аптеките, од кои однел извесна сума пари.

Судот на барање на надлежниот обвинител, на осомничениот му одредил 30 дена притвор поради опасност од бегство, можно влијание на сведоци и од повторување на делото.


Пациентите два месеци се без лекот „синтром 4“ и ќе треба да се стрпат до февруари


Скопје, 26 октомври, 2016 - 13:05 (META) 

Повеќе од два месеци, пациенти од Македонија што го користат лекот „синтром 4“ од канадската компанија „Мерус лабс“ не можат да го набават поради тоа што не е увезен. Според последните информации, лекот ќе го нема до наредната година, а оптимистичките прогнози велат дека треба да се појави во февруари.

– Со денови одам по аптеки и барам „синтром 4“. Имам тромбоза и го пијам по шема така што не смеам да прескокнам ниту една доза. Во аптеките има од овој лек, но само од „Реплек“ и од „Јака Радовиш“, ама докторите сугерираат задолжително да е „синтром 4“. Ако ја пропуштам дозата, морам да одам на лекар да ми ја проверат крвта, па таму да ми кажат што понатаму треба да правам – ни изјави пациентка од Скопје.

Од Бирото за лекови за „Мета“ тврдат дека проблемот не е до нив, туку до увозникот кој треба да го увезе кога веќе ќе нема резерви.

Директорката на Бирото за лекови, Марија Дарковска, вели дека пред еден месец потпишала решение за увоз на 5.000 кутии од овој лек.

– Јас лично го потпишав решението за увоз на овој лек. Не знам зошто го нема. Сега сум во странство, ќе ја бранам докторската теза и не можам да се посветам на други прашања, затоа што ова за мене е најбитно – ни изјави Дарковска во телефонскиот разговор.

Таа посочува дека проблемот можеби е во тоа што овој лек повеќе не е на „Новартис“ туку го купил друг производител, со што скопското претставништво на швајцарската компанија ги нема расчистено односите за пренос на правата со новиот увозник „Европа лек“. Имено, од февруари годинава лекот „синтром 4“, кој беше производ на швајцарската компанија „Новартис“ (NOVARTIS Pharma Services inc.), го купи канадската фирма „Мерус лабс“. Претходно лекот го увезуваше македонското претставништво на оваа фирма.

Од „Европа лек“, која сега е увозник на лекот „синтром 4“, велат дека од Бирото за лекови побарале дозвола за увоз на 25.000 кутии, но Комисијата за одобрување им дозволила и им дала решение за само 5.000 пакетчиња.

– Ние побаравме повеќе, но Бирото за лекови ни одобри само 5.000 кутии. Од фирмата што го произведува лекот ни рекоа дека неисплатливо им е да ни произведат само толку парчиња и ни побараа повеќе. Сега испративме ново барање до Бирото и чекаме одобрување за да можеме да увеземе – вели Моника Наумовска, раководител на регулатива во „Европа лек“.

Сепак, таа вели дека лекот ќе го нема оваа година затоа што количествата со англиско упатство повеќе ги нема, а за компанијата да испечати парчиња на македонски јазик потребно ѝ е време.

– Годинава најверојатно ќе заврши без овој лек. Се надеваме дека, доколку Бирото за лекови побрза со решението, „синтром 4“ ќе го има во аптеките во февруари следната година – нè информираше Наумовска.

Низ скопските аптеки и во сите поголеми фармацевтски продажни места („Зегин“, „Еурофарм“ и „Виола“) овој лек го нема повеќе од два месеци.

Од дистрибутерот, пак, „Феникс фарм“, велат дека лекот го имало само уште во една аптека во Скопје, но по проверката се утврди дека и таму е потрошен и веќе го нема. Иста е состојбата и во другите аптеки низ Македонија.

„Синтром 4“ или „аценокумарол“ припаѓа на групата лекови кои се нарекуваат антикоагуланти (лекови што ја разретчуваат крвта). „Аценокумарол“ се употребува за лекување и за спречување формирање крвни згрутчувања (тромбови), кои ги блокираат крвните садови, на пример, при длабока венска тромбоза. Овој лек го пијат пациенти со срцеви проблеми (операции, аритмии), пациенти со прележани мозочни и срцеви удари и со тромбози.


Нема лекови на рецепт во аптеките, пациентите протестираат – и плаќаат


Скопје, 26 април, 2016 - 11:59 (META) 

Нема лекови на рецет во аптеките, реагираат Скопјани, тврдејќи дека со денови бараат лекови, но не можат да ги набават освен ако не ги купат „приватно“.

Како што велат тие за „Мета“, станува збор за антибиотици и за лекови за луѓе болни од рак, кои никаде низ Скопје ги нема на рецепт.

Од аптеките низ градот тврдат дека тие работат со квоти на лекови што можат да ги издаваат на рецепт и кога ќе им заврши предвидениот број, мора да се чека нов месец. Велат дека проблемот не е кај нив, туку до правилата востановени од Фондот за здравствено осигурување на Македонија (ФЗОМ).

Томица Новаковски, од скопски Аеродром, цел ден барал антибиотик на рецепт поради тоа што лекарот му констатрал воспалување на белите дробови. Но, како што тврди, никаде не можел да најде на рецепт, туку можел да си ги купи само по редовна цена.

– Цел град го поминав да го најдам антибиотикот и ништо. Веднаш им пишав и во Министерството за здравство, ама оттаму само ми рекоа дека наредните денови ќе има. Истото ми го тврдат и во аптеките. И сега, што треба да правам? Да чекам да дојде први? А моето здравје? Што ако немам пари да ги купам по редовна цена – прашува Новаковски.

Со истиот проблем се соочува и Соња Миленковска, која е болна од рак и прима редовна терапија од лекот „тамоксифен“.

– Никаде го нема на рецепт. Во аптеката им реков дека овој лек ми е многу важен, но тие креваат раменици и тврдат дека не е до нив. Не знам каде е проблемот, само вака не може да се живее. За некои луѓе лековите се побитни и од храната – вели Миленковска.


Пациентите два месеци оставени без лекот „синтром 4“


Скопје, 18 јуни, 2015 - 16:10 (META) 

Веќе два месеци пациентите од Македонија што го користат лекот „синтром 4“ од швајцарската компанија „Новартис“ не можат да го набават поради тоа што нема увоз.

Тие се жалат дека во ниту една аптека го нема, а им е неопходен и многу потребен за нивното здравје.

– Со денови одам по аптеки и го барам лекот „синтром 4“. Имам тромбоза и го пијам по шема така што не смеам да прескокнам ниту една доза. Во аптеките има од овој лек, но само од „Реплек“ и од „Јака Радовиш“, ама докторите сугерираат задолжително да е од „Новартис“. Ако ја пропуштам дозата, морам да одам на лекар да ми ја проверат крвта, па таму да ми кажат што понатаму треба да правам – ни изјави пациентка од Скопје.

Од Бирото за лекови тврдат дека не е проблемот до нив, туку до увозникот кој треба да го увезе кога веќе ќе нема залиха.

Од увозникот за Македонија, „Новартис фарм“ (NOVARTIS Pharma Services inc., Претставништво – извод од листата на Бирото за лекови н.з.) тврдат дека лекот е увезен и веќе го има во аптеките.

– Овој лек го има низ аптеките. Увезен е и има доволно количество. Проверете, ако сакате, кај дистрибутерите „Македонија лек“ и „Феникс“ за да се уверите – ни изјави Сузана Тренчевска, одговорно лице за комуникација од „Новартис фарм“ во Скопје.

Се јавивме и во „Македонија лек“ да прашаме дали навистина веќе го добиле лекот.

– „Синтром 4“ нема веќе неколку месеци. Немаме најава дали и кога ќе го добиеме – велат оттаму.

Низ скопските аптеки и во сите поголеми фармацевтски продажни места („Зегин“, „Еурофарм“ и „Виола“) овој лек го нема веќе два месеци.

„Синтром 4“ или „аценокумарол“ припаѓа на групата лекови кои се нарекуваат антикоагуланти (лекови што ја разретчуваат крвта). „Аценокумарол“ се употребува за лекување и за спречување формирање крвни згрутчувања (тромбови), кои ги блокираат крвните садови, на пример, при длабока венска тромбоза. Овој лек го пијат пациенти со срцеви проблеми (операции, аритмии), пациенти со прележани мозочни и срцеви удари, со тромбози…