Советот на Оопштина Охрид на денешната седница ја усвои одлуката за субвенционирање евтини авиолетови од аеродромот „Свети Апостол Павле“ во Охрид. Средствата се лимитирани на 36 милиони денари и ќе се исплаќаат директно од буџетот на Општина Охрид, на четири рати, и тоа во 2015 година ќе бидат исплатени шест милиони денари , во 2016 и во 2017 – 12 милиони и во 2018 година – уште шест милиони денари.
На почетокот ќе се субвенционираат само сезонските летови, а веќе од 2016 година ќе се субвенционираат и редовни авиолинии кои ќе бидат финансиски поддржани од Општина Охрид. Авионските летови ќе сообраќаат меѓу Охрид и лондонскиот аеродром „Лутон“.
– По ова следува изработка на квалитетна тендерска документација и претпоставувам дека овајпат ќе се јават заинтересирани страни, односно авиокомпании што ќе ги прифатат условите за финансиска поддршка за воспоставување прво на сезонски, а потоа и на редовни летови до и од охридскиот аеродром. Ова претставува стремеж на сите туристички работници, меѓутоа и на граѓаните на Охрид и на Република Македонија за воспоставување врска кон и од охридскиот аеродром – рече пред советниците градоначалникот на Охрид, Никола Бакрачески.
Бакрачески вели дека и Министерството за транспорт и врски ќе се вклучи со субвенционирање авиолетови по теркот како што го правеа досега за скопскиот аеродром.
– Првпат оваа година, по нашето лобирање пред државните органи, покрај субвенционирање летови за скопскиот аеродром, ќе бидат субвенционирани и летови кон охридскиот аеродром. Се работи за субвенционирање летови помеѓу Базел и Охрид, што, во принцип, значи развојна стратегија на туризмот во Охрид. Во 2015 година ќе имаме најмалку две линии кон и од охридскиот аеродром – додава Бакрачески.