This page was exported from Meta.mk [ http://meta.mk ]
Export date: Tue Oct 24 0:18:15 2017 / +0000 GMT

Собранието не расправаше за законот за јазиците, пауза до утре поради локалните избори




По подолга пауза, Собранието попладнево ја прекина 15. седница, на која требаше, меѓу другото, да расправа за Законот за употреба на јазиците, со образложение дека сите парламентарни партии имале обврски поради пријавувањето на кандидати за локалните избори.

Претходно експресно беше изгласана одлуката за објавување јавен оглас за избор на член на Државната изборна комисија (ДИК), која беше уфрлена како дополнителна точка.

Денешната седница мина со две гласања за симнување на законот за јазиците од дневниот ред и со две барања за пауза, кои претседателот на Собранието, Талат Џафери, ги одобри, а последната потраја многу подолго од предвиденото.

Пред давањето пауза во 13.40 часот во Собранието се случуваше жестока расправа за дневниот ред на седницата, кога пратениците од ВМРО-ДПМНЕ излегоа на собраниската говорница. Опозициската партија бараше пауза откако нејзините претставници не успеаја нивните обиди законот за јазиците да се симне од дневниот ред.

Речиси сите координатори на пратеничките групи на ВМРО-ДПМНЕ во расправата бараа да се симне законот од дневниот ред. Тие велеа дека законот не може да има европско знаменце оти не е наведено со кој пропис на ЕУ се усогласува, како и дека е прекршен деловникот, оти не бил даден во Комисијата за политички систем како матична комисија, туку на Комисијата за европски прашања.

Седницата ќе продолжи утре во 11 часот.
Post date: 2017-09-13 15:57:50
Post date GMT: 2017-09-13 13:57:50
Post modified date: 2017-09-13 15:57:50
Post modified date GMT: 2017-09-13 13:57:50
Powered by [ Universal Post Manager ] plugin. HTML saving format developed by gVectors Team www.gVectors.com