„Во август минатата година, Никола Груевски фрли лопата и најави изградба на нова индустриска зона во Радовиш. Денеска, по цели 15 месеци, наместо индустриска зона во Радовиш стои празно земјиште со по некоја прокопана дупка. И толку. Ниту има нови фабрики, ниту има нови работни места“, обвини СДСМ преку соопштение.
„Ова е уште еден доказ за виртуелните индустриски зони со кои предизборно се расфрла Никола Груевски, неуспешно обидувајќи се да ги манипулира граѓаните. Бидејќи Груевски најави дека Владата ќе инвестира 11 милиони евра во оваа виртуелна зона, сега тој треба да одговори каде се парите?“, прашуваат од СДСМ.
Во соопштението на опозицијата се вели дека единствените реални „инвестиции“ на Никола Груевски се парцелите на Водно, „мерцедесот“ од 600.000 евра, очилата од 60.000 долари, провизиите, тендерите за споменици вредни 630 милиони евра.
„Граѓаните не му веруваат на Никола Груевски. Дури и Народна банка објави дека во третиот квартал од оваа година, во Република Македонија влегле само 8,5 милиони евра странски инвестиции. Со објавувањето на овој најнов податок, Народна банка и официјално ги потврди виртуелните странски инвестиции на Никола Груевски со кои виртуелно се расфрла пред заминување“, реагира СДСМ.
