!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Иванов ќе му го врачи мандатот за составување влада на Груевски


       
Скопје, 9 јануари, 2017 - 11:50 (META) 

Претседателот на државата, Ѓорге Иванов, денеска во 13 часот на претседателот на ВМРО-ДПМНЕ, Никола Груевски, ќе му го врачи мандатот за составување на новата влада на Република Македонија, соопштија од кабинетот на Иванов.

Врачувањето на мандатот ќе се одржи во претседателската вила на Водно.

Инаку, денеска е последниот ден од десетте дена, по конституирањето на новиот собраниски состав (30 декември 2016 година), во кои претседателот на државата, Ѓорге Иванов, треба да го додели мандатот за формирање на новата влада „на партијата или партиите кои имаат мнозинство во Собранието“, по предвремените парламентарни избори одржани на 11 декември.

Според членот 90 од Уставот, мандатарот, односно Груевски, „има рок од 20 дена од денот на доверувањето на мандатот, на Собранието да му поднесе програма и предлог-состав на Владата“.

Владата, на предлог на мандаторот и врз основа на програмата, ја избира Собранието со мнозинство гласови од вкупниот број пратеници.

Инаку, на предвремените парламентарни избори на 11 декември, ВМРО-ДПМНЕ освои најголем број пратенички мандати – 51, СДСМ има 49, ДУИ – 10, Движење Беса – 5, Алијанса за Албанците – 3 и ДПА освои 2 пратеници.