Педесетина гневни демонстранти попладнево упаднале во зградата на седиштето на лондонските квартови Кенсингтон и Челси, на чија територија се наоѓа опожарениот солитер Гренфил, кој досега одзеде најмалку 30 животи, јави „Би-би-си“, известувајќи дека според некои информации уште 70 луѓе се водат како исчезнати.
Демонстрантите ја турнаа автоматската врата што води кон првиот кат и беа запрени на скалите на вториот кат од неколкумина чувари. Се создаде тепачка меѓу демонстрантите и чуварите и при тоа дел од нив ја напуштија зградата.
Демонстрантите што се наоѓаа во зградата, како и оние што стоеја пред неа, скандираа „Сакаме правда“, „Срам за вас“, „Убијци“. Некои од демонстрантите носеа транспаренти со натпис „Правда за Гренфил“.
Се протестираше и кај станицата на метрото Нотинг хил, при што беше побарано побрзо реагирање на властите за згрижување на станарите на опожарените станови.
Британската премиерка Тереза Меј претходно соопшти дека за продукти и за други потреби на оштетените жители на солитерот ќе се издвојат 5 милиони фунти.
Пожарот во култата со 127 станови во западен Лондон изби во 1 часот по полноќ во средата и според сведоци, се ширел со голема брзина. Пожарот се гаснеше 24 часа.
Станарите на 24-катниот солитер со социјални станови обвинуваат дека причина за пожарот е неквалитетна изградба, а неколку медиуми пласираа докази дека се користеле неквалитетни материјали.