Во Велес вчера беше отворен петтиот EUROPE HOUSE во нашата земја, со што се зајакнува мисијата на Делегацијата на Европската унија за поврзување на младите со Европската унија и вредностите што ги носи Унијата, информираат од Делегацијата на ЕУ.
„Надоврзувајќи се на инспиративните примери на EUROPE HOUSE Скопје, Струмица, Крива Паланка и Битола, отворањето на EUROPE HOUSE Велес означува ново поглавје во напорите на ЕУ да ги премости празнините и да поттикне значаен напредок во давањето на сè повеќе можности на младите од нашата земја“, соопштуваат од Делегацијата на ЕУ.
На вчерашниот настан на отворањето беа организирани дискусии, уметнички изложби и социјални собири. Денот почна со динамичен дијалог помеѓу млади поединци и средношколци, воден од младите европски амбасадори Иван Дургутов и Елица Матевска, кои ги вклучија учесниците во дискусија за европската перспектива и потребите на младите во Велес.
По ова, присутните биле почестени со културна обиколка низ Велес, со посета на почитуваната Спомен-куќа на Кочо Рацин. Уметничката живост на градот била претставена и со групната изложба на девет талентирани млади уметници од вардарскиот регион.
„Денот продолжи со настан за вмрежување, што доведе до размена на визии и идеи меѓу учесниците. Прославата заврши вечерта со настап на локалните уметници диџеј Попај и Д Чикс во знак на поддршка за локалните таленти“, велат од Делегацијата на ЕУ.
