Оваа сабота во стрип книжарницата Бункер во Скопје ќе се одржи третиот по ред „Ден на бесплатни стрипови“.
Од Бункер ги повикаа сите издавачки куќи да земат учество во акцијата и информираа дека досега се обезбедени околу 700 бесплатни стрипови.
Акцијата започнува во 10 часот, а стриповите што се бесплатни ќе бидат јасно означени и лоцирани на главната маса кај касата, велат од Бункер, од каде најавија и големи попусти на сите останати производи.
Стриповите ќе се делат според принципот „прв дојден, прв услужен“, а секој ќе може да подигне максимално два бесплатни стрипа.
Од Бункер најавија дека наскоро ќе бидат објавени и слики со изданијата кои ќе може да се подигнат бесплатно.
Како и минатата година, така и оваа дел од стриповите ќе бидат подарувани и во продавницата на „Светот на Биби“ во Битола.
