Министерот за внатрешни работи Оливер Спасовски во кругот на СВР Куманово го откри спомен-обележјето во чест и вечен спомен на загинатите припадници на македонската полиција, кои ги положија животите во 2015 година, во вооружената престрелка со терористичка групација во кумановско „Диво насеље“, а во одбрана на Куманово, информираат од Министерството за внатрешни работи.
Откривањето на спомен-обележјето е во рамки на одбележувањето на 22 години од формирањето на Единицата за брзо распоредување (ЕБР) во рамки на МВР, кое денеска се одвиваше во Куманово.
„На сите припадници на ЕБР им го честитам Денот на единицата, 22 години постоење јакнење, напредување, сè во интерес на државата и граѓаните. Денеска низ многу активности овде во Куманово ја одбележуваме годишнината од формирањето на оваа елитна единица на МВР. Во Куманово затоа што оваа прослава ја посветивме на осумтемина полициски службеници кои ги дадоа своите животи во настаните 2015 година кога беше извршен терористичкиот акт во Диво Насеље. Овде во градскиот парк се дружиме со граѓаните, со најмладите, изложена е опремата, можат да ги видат сите активности на специјалните единици, да се запознаат со вештините, но најмногу со посветеноста на секој еден припадник на ЕБР”, рече министерот Спасовски.
Тој изјави дека во рамките на прославата на Денот на ЕБР организирале настан на којшто ја исполниле обврската за откривање на спомен-обележје во чест на осумте загинати припадници на САЕ Тигар и на ЕБР.
