Комесарот за миграција и за внатрешни работи на ЕУ, Димитрис Аврамопулос, денеска е во Бугарија каде го означи почетокот на работата на новата погранична и крајбрежна безбедносна агенција.
Официјалниот почеток на работата беше означен на граничниот премин Капитан Андреево, на границата на Бугарија со Турција, во присуство на бугарскиот премиер Бојко Борисов, извршниот директор на агенцијата, Фабрис Легери, и на други високи претставници на властите во Бугарија.
Главна задача на новата гранична служба ќе биде чувањето на надворешните граници на ЕУ во променетите околности поврзани со безбедноста и со миграцијата и ќе ја замени досегашната Фронтекс.
Формирањето на службата траеше околу девет месеци од предлогот за нејзиното основање од Европскиот парламент и од Советот на ЕУ.
Граничната служба ќе извршува постојана оцена на слабите места на надворешните граници. Таа ќе располага со постојан контингент од 1.500 европски граничари, подготвени за брза реакција.
– Ова е важен момент за Европа и секој од нас по извесно време ќе биде горд што бил тука – изјави денеска бугарската вицепремиерка и министерка за внатрешни работи, Румјана Бачварова, на официјалната церемонија.
