Во касарната „Илинден“ во Скопје денеска се одржа свеченост за прием на 150 нови професионални војници во редовите на Армијата на Република Северна Македонија. Оваа година во армијата беа примени вкупно 300 професионални војници, од околу 1.900 кандидати кои се пријавија на двата јавни огласи, соопшти Министерството за одбрана.
Министерката за одбрана Славјанка Петровска на новопримените професионални војници им порача дека честа да се облече армиската униформа е голема и дека нивната цел од која никогаш не треба да се откажат е службата кон татковината.
Петровска истакна дека благодарение на посветеноста, професионалноста, но пред сè на љубовта кон татковината и личната пожртвуваност, денес Армијата е модерна, современа Армија во која припадниците не прашуваат зошто, и не бараат изговори, туку велат „веднаш“ и дејствуваат.
„И во 2023 година беа забележани многу успеси на нашите армиски припадници, од учество во вежби, освојување медали, учество во мировни мисии, но и без колебање учество во спасувачки мисии. Да се биде војник, офицер или подофицер не е лесно, и токму затоа ги бираме најдобрите“, подвлече Петровска.
На свеченоста присуствуваа и началникот на Генералштабот на Армијата, генерал потполковник Васко Ѓурчиновски и заменик-министерот за одбрана, Тирон Јајага.
На конкурсот за прием на 150 професионални војници пријавени беа 1.144 кандидати.
