ВМРО-Народна партија ги поздравува преговорите на лидерите на четрите политички партии, со кои се обидуваат да најдат мирно решение за излез од длабоката политичка криза во која е вовлечена Македонија.
ВМРО-Народна партија закажаната средба во Стразбур со посредство на меѓународната заедница помеѓу Никола Груевски и Зоран Заев, ја гледа како единствена можност која не смее да се испушти за постигнување трајно политичко решение, а во корист на сите граѓани на Македонија.
„За таа цел, ја повикуваме ВМРО-ДПМНЕ на својата агенда конечно да ја стави демократизацијата на општеството во оние сфери за кои перманентно добиваме сериозни забелешки во извештаите од Европската унија, а се однесуваат на напредокот на Македонија на патот кон ЕУ и кон НАТО. Особено, укажуваме дека ВМРО-ДПМНЕ мора како владејачка партија да направи прецизна и конкретна агенда и да каже како ќе спроведе целосно фер и демократски избори, признаени за легитимни од сите партии учесници во изборниот процес и од меѓународните набљудувачи. Во исто време, од СДСМ бараме да ги напуштат досегашните максималистички барања и да ги преформулират во порационални ставови, со што политичкиот дијалог ќе биде полесно остварлив во наоѓањето компромисни решенија на задоволство на двете страни“, се вели во соопштението на партијата.
ВМРО-Народна партија, стои во реакцијата, во овој момент го реафирмира предлогот за амнестија која се однесуваше за прислушувањето и изборните нерегуларности како политички дел, со тоа што сега, до ВМРО-ДПМНЕ и до СДСМ, предлага амнестијата да го опфати и делот од финансиско-корупциски малверзации.
