Започнува реализацијата на проекти за домување на Ромите за што ќе бидат искористени четири гранта во вредност од околу 3,2 милиона евра за период од три години. Станува збор за општините Прилеп (населба Тризла), Битола (населба Баир) и ромските населби во Штип, Берово и Кичево.

Ова го најави денеска премиерот Зоран Заев на заедничката прес конференција со  министерката за труд и социјална политика, Јагода Шахпаска, ЕУ амбасадорот Дејвид Гир, пратеничката Латифа Шиковска и претставници на граѓанските организации.

Заев објасни дека проектите се во рамките на Инструментот за претпристапна помош – ИПА 2, кој Владата го спроведува со поддршка од ЕУ и кои се остваруваат со иницијативата „Интеграција на Ромите, во чии рамки во 2019 година беше усвоена Декларација за земјите од Западен балкан за интеграција на Ромите.

„Оваа Декларација ги поттикна лидерите од регионот да ја прифатат потребата од заедничка заложба за засилување на напорите за интегрирање на ромската популација, како една од најранливите групи во општествата во регионот. Дојдовме до стартот на реализацијата на проектите, во делот на домување и во делот на постигнување услови за легализирање на неформалните населби каде што живеат Ромите“, истакна Заев, кој додаде дека во буџетот за 2021 година се издвоени 62 милиони денари за поддршка на имплементацијата на годишните оперативни планови од годишните оперативни планови од Стратегијата на Ромите.

Според Шахпаска, во населбата Трисла ќе се легализираат куќи на 700 ромски домаќинства, потоа ќе се легализираат имоти на 5.000 Роми во населбата Баир во Битола, во Штип ќе се легализираат 1.027 куќи и 40 во Берово. Ќе се изградат и нови живеалишта, во Штип 50 куќи, во Кичево 30 станови, а ќе се реконструираат 50 куќи во Прилеп и 15 куќи во Берово.

Амбасадорот Гир истакна дека финансирањето на ЕУ останува на располагање за поддршка на ваквите активности.

Пратеничката Шиковска ги посочи заложбите за да застапува и да иницира решенија кои што ќе бидат во корист на најранливите категории на граѓани.

На настанот беа презентирани четирите проекти кои опфаќаат легализација на куќи, подобрување на инфраструктура и безбедни услови за живот, поправка и реконструкција на домови, вработување на млади Роми, поддршка за ученици со туторство после училиште, како и подигнување на свеста за еднакви права и пристап до здравствена заштита.