Под мотото „Не е сѐ во брзината!”, в недела ќе се одржи бавна трка со мотоциклисти. Како што информираат организаторите, мото клубот „Вепар“, оваа трка се организра по шести пат, а ќе се одвива во четири категории – мотоцикли до 50 цм3, мотоцикли од 51 до 500 цм3, мотоцикли од 501 цм3 до 1.000 цм3, како и мотоцикли поголеми од 1.000 цм3.
„Трката ќе се одвива на начин на кој истовремено ќе се натпреваруваат по двајца учесници по систем на елиминација. Победникот продолжува со натпреварување. Победник е оној кој поспоро ќе стаса до целта. Правилата налагаат учесниците да не смеат да одат надвор од обележаната траекторија, а не смеат ни да допрат со нога на земја (со самото допирање се елиминира од трката). Учесникот кој последен ќе ја помине целта е победник“, информираат во мото клубот.
Главната точка на оваа манифестација е бавната трка од едуктивен карактер којa има за цел да ја подигне свеста на сите учесници во сообраќајот, особено мотоциклистите, укажувајќи на потенцијалната опасност од управување со голема брзина.
Сите заинтересирани за учество во мото трката можат да се пријават на штандот пред патеката во просториите на клубот на Илинденска во Карпош 4, помеѓу 10 и 11.30 часот на денот на настанот.
„Пријавувањето е од 10 до 11 и 30 часот, а трката официјално започнува во 12 часот. Во 14 часот ќе има забавна програма со музика, скара, пиво и дружба. Учеството е бесплатно“, се наведува во соопштението.
