fbpx

Украина го менува начинот на регрутација на нови борци против руската агресија

Украинската влада планира да ги промени своите практики, бидејќи се обидува да го одржи борбениот капацитет по речиси две години од руската агресија врз Украина

-

Украина ќе ги промени политиките за регрутирање со цел да го одржи борбениот капацитет во пресрет на новите борби со Русија. Промените ќе вклучуваат употреба на комерцијални фирми за регрутирање за извршување на поцелно регрутирање на нови припадници, велат официјалните лица на Украина, пренесува Гардијан.

Украинската влада планира да ги промени своите практики, бидејќи се обидува да го одржи борбениот капацитет по речиси две години од руската агресија врз Украина.

Промените, кои се очекува да бидат објавени оваа недела, ќе вклучуваат употреба на комерцијални компании за регрутирање за да извршат поцелно регрутирање и да ги уверат регрутите дека ќе бидат распоредени во улоги што одговараат на нивните вештини, а да не бидат едноставно испратени на фронтот.

„Некои луѓе се исплашени, се плашат да умрат, се плашат да пукаат, но тоа не значи дека не можат да бидат вклучени во други активности… Сега имаме нов министер со нов пристап“, Олексеј Данилов, секретар за Советот за безбедност на Украина.

На почетокот на септември, претседателот Володимир Зеленски го разреши Олексиј Резников, кој беше министер за одбрана од почетокот на војната, и го замени со Рустем Умеров.

„Планот ќе биде разработен и сите одговори ќе ги има – следната недела ќе го видам овој план“, рече Зеленски на прес-конференција, без да даде дополнителни детали.

Данилов рече дека армијата ќе соработува со две од најголемите компании за регрутирање во Украина со цел да се идентификуваат луѓето со специфични вештини и да се одвратат вештите Украинци кои сакаат да ѝ помогнат на армијата, но не и да одат на фронтот.

„Мобилизацијата ќе стане пофлексибилна, ќе се објават оние специјалности кои се потребни, а луѓето ќе волонтираат за конкретна позиција. На пример им требаат заварувачи или механичари и слично“, вели Данилов.

Извор од Министерството за одбрана потврди дека се потпишани договори со компании за регрутирање, но не даде повеќе детали. Не беше веднаш јасно колку компаниите за регрутирање ќе бидат вклучени во процесот, ниту на кое ниво генералното регрутирање за работа во првите редови ќе продолжи заедно со досегашниот процес.

Најавата на Зеленски доаѓа додека Украина се подготвува да се соочи со уште една зима во војна, со широк замор на фронтот и во општеството во целина. Летната и есенската украинска контраофанзива не успеа да доведе до ослободување големи територии, а меѓу западните партнери на Украина се зголемуваат гласовите кои приватно сугерираат дека порано или подоцна Кијив можеби ќе треба да размисли за обид за преговарачки крај на војната.

Во првите месеци од војната, стотици илјади Украинци доброволно се пријавија да се борат, како дел од бранот патриотска одлучност што ја шокираше Русија и го одби нејзиниот првичен напредок. Но, како што војната се одолговлекува, повеќето луѓе кои се подготвени да се борат веќе се пријавиле, а многу од оние кои веќе се на фронтот, се повредени или исцрпени.

Сè повеќе армијата мораше да се сврти кон мобилизација за да ги пополни редовите со нови припадници. Виралните видеа прикажуваат мажи грубо грабнати од улица за да бидат регрутирани, а има и бројни корупциски скандали на службеници кои земале мито за да обезбедат ослободување од регрутација. Во август годинава, Зеленски го отпушти секој регионален шеф за регрутирање.

Откако ќе се регрутираат, регрутите добиваат неколкунеделна обука и потоа можат да бидат испратени на фронтот. Многу Украинци велат дека доколку бидат повикани, би отишле во војска, но многу мажи на возраст за регрутирање кои не сакаат да бидат испратени на фронтот, поминале недели или месеци криејќи се дома, обидувајќи се да ја избегнат оваа обврска.

Во летото, извори во Одеса објаснија популарна шема во градот, според која за надомест од 5.000 долари во готовина, мажите кои не сакаат да служат може да добијат лажен медицински извештај кој сугерира сериозни проблеми со ‘рбетот, со кој би биле прогласени ослободени од воен рок и би им било дозволено да ја напуштат земјата.

Данилов призна дека имало проблем со регрутирање, но рече дека руската пропаганда го преувеличува обемот на проблемот.

„Русија се обидува да го подгрее ова прашање, велејќи дека немаме доволно војници, дека имаме проблеми со мобилизацијата… Секогаш има проблеми во животот, да не го преценуваме“, рече Данилов.

Нашите вести во вашето сандаче

Секој ден во 17 ч. добивајте ги вестите од Новинската агенција Мета директно на вашата електронска адреса.

Ве молиме одберете на кој начин сакате да добивате информации од нас:
Можете да се отпишете од оваа листа преку линкот на крајот од нашите пораки.

Гордана Силјановска-Давкова официјално е претседателски кандидат на ВМРО-ДПМНЕ

Гордана Силјановска-Давкова и официјално ќе влезе во трката за претседател на државата, како кандидат на ВМРО-ДПМНЕ. Таа денеска со мнозинство гласови беше избрана на Kонвенцијата која се одржа во...