Тетово и Гостивар се гушат во смет, откако жителите од гостиварските села четири дена го блокираат патот кој води до регионалната депонија Русино, каде повеќе општини од полошкиот регион го депонираа сметот.
Во Гостивар контејнерите се преполни со смет, а отпад се трупа и на тротоарите и улиците.
– Низ, цел град се шири непријатна миризба, срамота – вели еден гостиварец
И на претоварната станица во Тетово лоцирана на влезот од градот, поради блокадата кон депонијата Русино секојднево се таложат по стотици тони отпад.
Попладнево учесниците на блокадата по средбата со градоначалникот на Гостивар Невзат Бејта, дозволија само камионите од Комуналното претпријатие Гостивар да го транспортираат сметот до Русино. За другите комунални претпријатија од полошко блокадата за транспортот до Русино се уште ќе трае.
– Гостивар е наш град, за ѓубрето од Гостивар нема да важи забраната за транспорт, но за возврат очекуваме директна поддршка за решавање на овој проблем од гостиварскиот градоначалник – вели еден учесник на блокадата.
Жителите од гостиварсктие села со блокада на локалниот пат кој води до регионалната депонија Русино започнаа уште во петокот, изразувајќи го револтот, од како што рекоа, неодговорниот однос на полошките општини, кои го носат сметот на оваа локација. Според нив, депонијата работи без никакви стандарди, а патната делница која води до Русино е целосно уништена од камионите на комуналните претпријатија.
За решавање на проблемот, учесниците на блокадата истакнаа дека писмено ќе се обратат до Центарот за полошки плански региони и Министерството за животна средина, надлежни за управување со регионалната депонија Русино.
