fbpx

„ТехноАлпин“ го претстави планот за инвестиции во Попова Шапка, предвидени се седум фази

-

Инвеститорите од италијанската компанија „ТехноАлпин“ заинтересирани за Попова Шапка денеска го претставија нивниот план за развој на овој туристички центар. Процесот е во рана подготвителна фаза и договорот сè уште не е потпишан. Министерот за животна средина призна дека во овој центар не се инвестирало цели дваесет години и рече дека се очекува тоа да се направи преку оваа компанија, а договорот се очекува да биде потпишан во текот на месец јануари. Од друга страна, процесот на одвојување на Попова Шапка од „Елем турс“ заврши и основана е компанија која ќе управува само со „Попова Шапка“, пишува Порталб.мк.

Извршниот директор на компанијата „ТехноАлпин“, Ерих Гумерер рече дека на Попова Шапка, меѓу другото, ѝ е потребен систем за вештачки снег, и дека нивната компанија е докажана во оваа насока со нивниот придонес во Зимските олимписки игри. Што се однесува до причините за нивната заинтересираност за една таква инвестиција на Попова Шапка, Гумерер изјави:

„Можам да ви кажам дека ги знам сите скијачки центри во светот, гледаме што функционира, а што не, откривме дека Попова Шапка има една одлична иднина, има висок потенцијал и добра основа, има потенцијал за туристите, и токму затоа рековме да. Веруваме дека оваа инвестиција ќе се реализира“.

На денешната прес-конференција, претставниците на оваа компанија накратко го презентираа планот за нивната инвестиција на Попова Шапка. Планирано е инвестицијата да се реализира во седум фази и истата вреди околу 180 милиони евра.

Првата фаза, вредна 55 милиони евра, ќе се реализира во периодот 2023-2028 година, а останатите фази (2-7) од 2028 година.

Тие, меѓу другото, рекоа и дека инвестицијата ќе опфати вкупно 16 нови ски-патеки, 9 нови ски-лифтови, 4 хотели, ресторани, викендички, италијанска пицерија, три нови паркинзи, нови патишта и друго.

Во првата фаза се очекува приоритет да биде изградбата на системите за вештачки снег, бидејќи се планира сезоната да трае подолго и истата да не зависи од снежните врнежи. Но, за да се произведе снег потребни се резервоари за вода, а поради тоа тој рече дека ќе инвестираат во две цистерни за вода. Тој нагласи дека е важно Попова Шапка да се користи и во текот на летото, и за тоа ќе се користат жичарниците и велосипедските патеки.

Поконкретно, во првата фаза планирано е да се реализираат следните инвестиции:

  • Поставување на две нови жичарници со 6/8 седишта;
  • Две нови скијачки патеки;
  • Инсталација на системи за вештачки снег;
  • Авантуристички парк, игралиште, простор за рекреација и релаксација;
  • Нов асфалтиран паркинг со паркинг простор за 600 автомобили;
  • Изградба на нови пристапни патишта до Попова Шапка;
  • Изградба на два нови хотели од категоријата со 4 ѕвезди;
  • Инвестирање во две нови машини за одржување на скијачките патеки.

Министерот за животна средина, Насер Нуредини, истакна дека за модернизација и проширување на овој центар не се инвестирало цели дваесет години, а долгорочниот недостиг на инвестиции довел до сериозни доцнења и недоволно искористување на многубројните можности и капацитети кои ги нуди оваа туристичка локација.

Имајќи предвид дека државата не можела да инвестира, тој нагласи дека изборот на „ТехноАлпин“ бил направен преку Законот за стратешки инвестиции и оваа компанија имала најприфатлива понуда и е сериозен инвеститор.

„Сега треба да седнеме и да ги усогласиме сите точки од договорот кои може да имаат било какви недостатоци, до јануари верувам дека ќе имаме еден финален договор кој ќе го претставиме на јавноста и кој потоа ќе го доставиме до Собранието“, рече Нуредини, додавајќи дека преку оваа инвестиција ќе се зголеми туризмот, приходите во државата и ќе се отворат нови работни места.

Меѓу другото, министерот нагласи и дека заинтересираниот инвеститор е информиран за состојбата во Попова Шапка и за проблемите таму.

Овој предлог-проект за стратешка инвестиција во Попова Шапка Владата го усвои на седницата одржана на 25 ноември.

Основана е компанија која ќе управува само со „Попова Шапка“

По многу одолговлекувања, конечно основана е нова компанија која ќе стопанисува само со Попова Шапка. Досега со овој туристички центар стопанисуваше „Елем Турс“ од Електрани на Северна Македонија (ЕСМ).

„Основани се две посебни компании „Молика“ и „Попова Шапка“. И двете се подружници на ЕСМ, кои се одвоени една од друга. „Молика“ и „Попова Шапка“ досега беа заедно во едно друштво – „Елем турс“. Сега „Елем Турс“ формално сè уште постои, но овие две компании не се дел од него, туку се директни фирми-ќерки на ЕСМ. Актуелната ситуација е таква“, велат за Порталб.мк, од Електрани на Северна Македонија (ЕСМ).

Основањето на оваа компанија која ќе стопанисува само со „Попова Шапка“ е првиот чекор кон модернизација на скијачкиот центар.

„Скијачкиот центар „Попова Шапка“ е основан од АД ЕСМ како основач и е во сопственост на државата. Поделбата е еден од главните процеси или работи кои треба да бидат што поедноставни и лесни до склучувањето на веќе објавениот договор со странскиот инвеститор. Ова ќе го потпомогне процесот, бидејќи целиот имот на „Попова Шапка“ ќе ѝ се префрли на новата компанија и таа ќе биде чиста компанија без долгови“, изјави Aдем Авзиу.

Поделбата на Попова Шапка и нејзиното функционирање во посебни делови беше побарано и од невладиниот сектор.

Во наредните денови се очекува да започне и скијачката сезона. И покрај напорите за подобрување на состојбата на терен од страна на менаџментот на центарот и локалната самоуправа, оваа зима ќе биде полна со предизвици и со стари проблеми, почнувајќи од немањето на доволно паркинг места, отпадоците, лошата патна инфраструктура, немањето на жичара, лошите услови и друго.

Ревитализацијата на „Попова Шапка“ беше и дел од Националната стратегија 2021-2027 на екс-премиерот Зоран Заев.

Нашите вести во вашето сандаче

Секој ден во 17 ч. добивајте ги вестите од Новинската агенција Мета директно на вашата електронска адреса.

Ве молиме одберете на кој начин сакате да добивате информации од нас:
Можете да се отпишете од оваа листа преку линкот на крајот од нашите пораки.

Хеликоптер во кој патувал иранскиот претседател претрпи „тешко слетување“

Хеликоптер со иранскиот претседател Ебрахим Раиши претрпел „тешко слетување“, пишува Би-би-си. Министерот за внатрешни работи кажува дека спасувачите сé уште се обидуваат да стигнат до местото на несреќата поради тешките...