Informacione dhe ideja për kundër- protestë filluan të përhapen nëpër rrjetat sociale, por burimet tona, jozyrtarisht thonë se komitetet komunale të VMRO DPMNE në mënyrë të përforcuar përgatiten për kundër- protestë. Siç thonë ato, nëpër komitete madje përgatiten listat për kundër- protestë.
Konfirmim për këtë është fjalimi i kryeministrit Nikolla Gruevski në paraqitjen e tij në lajmet e televizionit Sitel. Kryeministri thotë se vazhdimisht ka pranuar thirrje që të veprohet më ashpër dhe të bëhet ndonjë organizim më i madh.
“Vazhdimisht pranoj porosi me revolt, pse nuk veprojmë më ashpër, pse nuk organizohemi e kështu me radhë. Madje dëgjoj se kanë filluar të vet- organizohen, të bëjnë lista e kështu me radhë. Kjo nuk duhet bërë, duhet të jemi të qetë, të urtë, të arsyeshëm, që mos të kyçemi në lojën e Zoran Zaevit, i cili dëshiron të përgjak popullin dhe dhunshëm ta merr pushtetin”, deklaroi kryeministri në lajmet e Sitel.
Por, deputeti Zoran Ilioski nga Manastiri demanton deklaratat e kryeministrit. Ai në deklaratën për agjencinë e lajmeve “Meta” konfirmon se disa ditët e fundit mbahen takime në komitet, por për organizim të kundër- protestës nuk bëhet fjalë.
“Ne kemi takime të rregullta, por nuk kishte bisedë të tillë. Fare nuk mendojmë të futemi në skenarë ku qytetarët e një qyteti të njëjtë do t’i vinim ballë për ballë apo në përgjithësi qytetarët e shtetit. Do të thotë, fare nuk ka pasur diçka të tillë gjegjësisht organizimin e kundër- protestave”, thotë Ilioski.
