Në gjykatën Penale në Shkup përfundoi marrja në pyetje e ish-ministres së brendshme Gordana Jankullovska. Ajo pas disa orëve u largua nga gjykata duke shmangur pyetjet e gazetarëve. Ndërkohë në gjykatë ka qenë edhe sekretari i përgjithshëm i Qeverisë, Kiril Bozhinovski. Ndaj të dyve nuk u shqiptua masa e paraburgimit.
Jankullovska dhe Bozhinovski në rastin “Titanik” të Prokurorisë Speciale janë ndër të dyshuarit për manipulime dhe keqpërdorime zgjedhore gjatë zgjedhjeve të fundit.
Ndërkohë gjatë ditës në gjykatë u paraqitën edhe të dyshuarit e tjerë, mes të cilëve edhe Ismet Guri, i cili dyshohet për keqpërdorime zgjedhore në zgjedhjet e fundit lokale në Komunën e Çairit. Gjykata Penale edhe ndaj tij nuk shqiptoi masën e paraburgimit, por vetëm masë të përkujdesjes.
Prokuroria Speciale pritet të deklarohet pasi që Gjykata edhe në rastin e Jankullovskës dhe rastin e Ismet Guri nuk shqiptoi masën e paraburgimit.
Prokuroria Speciale Publike siç njoftoi, ka parashtruar ankesë ndaj vendimit të Gjykatës penale për ta refuzuar kërkesën e tyre që tetë të dyshuarit për mashtrime zgjedhore në rastin “Titanik”– të paraburgosen.
