ELEM TURS deklaroi sot se do të hap tenderin për kompaninë që do e bëjë analizën e Kodrës së Diellit gjatë muajit mars. Pas përfundimit të kësaj analize, pritet të merret vendim se çka do të ndodhë më tej me menaxhimin e kësaj qendre për skijim, njofton Portalb.mk.

Nga ELEM TURS njoftojnë për Portalb.mk se analiza është në fazën fillestare dhe se përpilimi i saj zgjat deri në tre muaj. Pasi të zgjidhet kompania e cila do ta bëjë këtë analizë, pritet që brenda tre muajve të ketë rezultat.

Nga ELEM thonë se do të merren hapa konkrete pasi analiza të përfundojë.

Komapnia ELEM TURS është DOOEL(Shoqatë me përgjegjësi të kufizuar) dhe prandaj ka të drejtë të hap tender në periudhën parazgjedhore, gjë që është e ndaluar nga Kodi zgjedhor.

Kodra e Diellit kohëve të fundit përballet me probleme të shumta: mungesë investimesh, mungesë e teleferikut me gjashtë ulëse, mungesë e vendeve për parkim, infrastrukturë e parregulluar si dhe mbeturina të pa pastruara. Gjendje kjo që shtyu Iniciativën Qytetare “Ta shpëtojmë Kodrën e Diellit” të ndërmarrë hapa më rigoroz. Kjo iniciativë organizoi protesta ku kërkoi që ELEM të tërhiqet nga menaxhimi me këtë qendër, pasi keqmenaxhimi për vite të tëra e ka shkatërruar Kodrën e Diellit.

Nga ana tjetër, kryeministri Zaev para pak kohësh informoi se tashmë po përgatitet studim i fizibilitetit, që do të japë përgjigje në pyetjet se cila është mënyra e duhur e menaxhimit dhe shfrytëzimit të kapacitetit pa u dëmtuar bukuritë natyrore të kësaj pjese të Maqedonisë së Veriut.

Iniciativa Qytetare “Ta shpëtojmë Kodrën e Diellit” këmbëngul në tërheqjen e ELEM nga kjo qendër skijimi dhe thonë se nuk do të heqin dorë derisa kjo të ndodh.