Наша обврска да се погрижиме ниту едно дете да не биде лишено од основните човечки потреби и удобности, заеднички да помогнеме да го направиме ова место подобар свет за нив за да можат живеат, а не само да преживеат. На децата не им е местото на улица, туку во училиштата, во образовниот процес. Ова го изјави денеска министерот за внатрешни работи Оливер Спасовски, кој денеска се обрати по повод промоцијата на протоколот за постапување со деца на улица.
На настанот, освен Спасовски, свои обраќања имаа и министерката за труд и социјална политика, Јована Тренчевска, амбасадорот на Норвешка за Србија, Северна Македонија и Косово, Јон Еуген Гелштад, како и постојаниот претставник на Канцеларијата на УНДП во Република Северна Македонија, Армен Григоријан.
„Со ова ќе се овозможи брза и координирана постапка за заштита на децата на улица од изложување на неповолни околности или штета, а децата ќе имаат и помош и поддршка, заштита, како и превентивни мерки кои обезбедуваат безбедна и стимулативна средина за животот и работните активности на секое дете, особено на децата во ризик”, истакна Спасовски.
Документот го работела работна група составена од претставници од Министерството за внатрепни работи, Министерството за образование и наука, Министерството за здравство, Министерството за правда и невладиниот сектор.
„Сериозноста во пристапот и неопходноста да им се помогне на децата од улица наметна воспоставување на широка лепеза на постапки и мерки наменети за стручните лица кои се во допир со целната група и на кои им е потребен унифициран, стандардизиран и единствен начин на постапување со овие деца”, рече министерката Тренчевска.
