Следната недела ќе почнат градежните активности за реконструкција на прилепската железничка станица.
Предвидено е целосно да бидат заменети покривите и подовите, да се санираат фасадите и внатрешноста на станицата, како и да биде поставена нова термичка изолација и нови тоалети. Реконструкцијата ја опфаќа и водоводната и електричната инсталација, внатрешното и надворешното осветлување, како и поставување системи за греење и за ладење и противпожарна заштита.
Со овој зафат се планира и модернизирање на патнички информативен систем, како и тоа станицата да се направи попристапна за лицата со намалена подвижност.
– Се работи за инвестиција од 2,2 милиони евра. Почнуваме од Прилеп, а потоа, како што ќе добиваат одобренијата за градење, ќе продолжиме низ цел Коридор 10 – изјави министерот за транспорт и врски Владо Мисајловски.
Б.Б.
