Претседателот на Европскиот парламент, Мартин Шулц, денеска изјави дека очекува членките на Европската унија да договорат заедничка политика за решавање на бегалската криза.
– Ќе има дискусии, но на крајот ќе се договориме за план за раселување бегалци – рече Шулц во интервју за германското радио „Дојчландфунк“.
Изјавата на претседателот на ЕП доаѓа еден ден пред вонредниот состанок на министрите за внатрешни работи и за правда на земјите-членки на ЕУ во Брисел.
Министрите вторпат во последните осум дена расправаат за контроверзниот план на Европската комисија за релокација на околу 120.000 бегалци од камповите во Грција, Италија и во Унгарија, врз основа на задолжителните квоти што ги одреди ЕК.
Планот минатата недела предизвика жесток отпор кај земјите од Средна и од Источна Европа, кои не сакаат Брисел да им диктира колку бегалци треба да примат.
На истата тема, во Брисел, в среда ќе разговараат и шефовите на држави и на влади, на вонреден состанок, кој го свика претседателот на Европскиот совет, Доналд Туск.