ВМРО-ДПМНЕ треба да се надмине себеси и да престане со својата неодговорна политика и наместо тоа, да покаже одговорност и да дејствува во решавањето на отворените прашања, во унапредувањето на добрососедските односи и во отворањето на евроатлантските перспективи, стои во реакцијата на владејачката СДСМ на одлуката на централниот комитет на ВМРО-ДПМНЕ да не го поддржи во парламентот договорот со Бугарија.
„Договорот за пријателство, добрососедство и за соработка помеѓу Македонија и Бугарија е основа за пријателство и за заемен успех на двете држави, а неговото потпишување е заеднички успех на сите досегашни влади, на сите партии и на сите граѓани. Затоа, особено важно е ВМРО-ДПМНЕ да покаже одговорност и да учествува во заокружувањето на процесот и да даде поддршка на договорот“, стои во реакцијата.
Од партијата наведуваат дека ВМРО-ДПМНЕ треба да сфати дека политиката значи одговорност, а добрососедските односи се и треба да бидат врвен приоритет за Република Македонија и за нејзините граѓани.
„Договорот помеѓу Република Македонија и Република Бугарија е во согласност со националните интереси на Република Македонија и одговара на интересите на граѓаните и на Македонија и на Бугарија. Со договорот се реафирмира позицијата дека се работи за две посебни држави, два посебни народа и два посебни јазика, се затвора прашање што непотребно одвлекува внимание и енергија и се забрзува процесот на интеграција во ЕУ и во НАТО. Со потпишување на договорот, Македонија станува држава пример за соработка во регионот и ја зајакнува меѓународната позиција што ВМРО-ДПМНЕ ја поткопуваше цели 11 години само за да ги оствари сопствените криминални интереси“, велат од СДСМ.
