Претседателството на Генералниот совет на ДУИ на седницата одржана денеска, дискутираше за последните политички случувања во земјата, откако политичките партии не постигнаа договор во Брисел на 10 јуни.
Откако претседателот на партијата, Али Ахмети, го информираше членството, претседателството на ДУИ изрази разочарување од неуспехот на преговорите и од непочитувањето на договорот потпишан помеѓу лидерите на четирите најголеми политички партии во земјата.
ДУИ смета дека договорот постигнат од политичките лидери на 2 јуни, а поддржан од меѓународните партнери, продолжува да биде добра основа за надминување на кризата.
Затоа, од ДУИ ги повикуваат лидерите на политичките партии во земјата да размислуваат сериозно за да се најде решение за остварување на договорот од 2 јуни, при што ќе бидат надминати тесно партиските интереси, а интересите на граѓаните и на земјата ќе се стават на прво место.
Тие ги повикуваат меѓународните партнери да продолжат со ангажманот и да не губат верба во капацитетот, волјата и во посветеноста на лидерите за да се најде решение за кризата.
Претседателството на Генералниот совет, информираше дека ја разгледало положбата на ДУИ во однос на последните случувања и одлучиле ова прашање да го постават пред Генералниот совет како највисоко тело на партијата, оставајќи ги отворени сите опции за позицијата на ДУИ во иднина.
