Повеќе од 30.000 Палестинци се убиени во Газа од 7 октомври до денес, според податоците на Министерството за здравство на Хамас, а најголем број од починатите се жени и деца, соопшти Би-би-си.
Во дневниот билтен, Министерството соопшти дека во последните 24 часа биле убиени 81 луѓе, со што вкупниот број достигна 30.035 жртви.
Реалниот број на загинати најверојатно ќе биде многу повисок бидејќи во пребројувањето не се вклучени оние кои не стигнале до болниците и луѓето под урнатините од згради.
Повеќе од 70.000 повредени лица се регистрирани од страна на Министерството за здравство во Газа (МЗ), кое е единствениот официјален извор за жртви. Нејзините податоци се цитирани од агенции на ОН и други меѓународни институции.
Светската здравствена организација (СЗО) вели дека има долгогодишна соработка со организации во Газа и дека имаат добар капацитет за собирање/анализа на податоци.
СЗО забележува дека при споредба на денешните податоци за смртни случаи во Газа и претходните податоци од минатите конфликти во Газа, јасно се покажува дека има зголемен број цивили кои се убиени, со поголем процент на жртви на деца и жени.
На крајот од секој ден, болниците испраќаат списоци на сите жртви, вклучувајќи имиња, датуми на повреда или смрт и детали за повредите и состојбата до централизиран систем на Министерството за здравство.
Тековната критика на постојните бројки е дека тие не даваат точна причина за тоа како биле убиени Палестинците, не прават разлика за тоа дали починале при израелски воздушни напади, артилериско гранатирање или друго. Сите жртви во моментов се вбројуваат како жртви на „израелската агресија“.
Во последните неколку дена, МЗ Газа истакна повеќе случаи на она што СЗО го нарекува „индиректна смртност“ односно луѓе кои умираат како резултат на војната, но не директно поради борбите.
Во средата, беше соопштено дека шест деца починале од дехидрација и неухранетост во болниците во северниот дел на Газа.
ОН предупредуваат дека четвртина од населението на Газа сега е во опасност од глад и дека има драматично зголемување на заразните болести, надополнети со општиот недостиг на лекови и недостатокот на медицинска нега.
