fbpx

Поради измените во Кривичниот законик, преквалификувано делото за Мухамед Зеќири

Зеќири сега ќе се гони според член 353, став 4. Претходно по овој став казната изнесуваше најмалку 5 години затвор (а најмногу 20), а со новите законски измени, предвидена е парична казна или затвор до 5 години

-

Судењето за поранешниот генерален секретар на Владата, Мухамед Зеќири, денеска почна од почеток, бидејќи поради последните измени во Кривичниот законик обвинението беше преквалификувано.

Зеќири претходно се гонеше за „Злоупотреба на службена должност“ според член 353, став 5 кој предвидуваше казна затвор од минимум 5 години. Со контроверзните измени во Кривичниот законик, кои предизвикаа лавина реакции во јавноста, овој став беше избришан. Сега, Зеќири ќе се гони според член 353, став 4. Во однос на овој став, претходно казната изнесуваше најмалку 5 години затвор (а најмногу 20), а со новите законски измени, предвидена е парична казна или затвор од 1 до 5 години.

И од обвинителството и од одбраната на денешното рочиште рекоа дека стојат на истата листа докази како и во првичното обвинение.

„За обвинетиот, во конкретниот случај има измени во диспозитивот на обвинението, имајќи го предвид фактот дека правната квалификација што му се става на товар се менува, во зависност од член 32 од измените на Кривичниот законик“, рече обвинителката Катерина Коларевиќ.

Со оглед на тоа што сега за Зеќири казната затвор може да изнесува најмногу 5 години затвор, обвинителството го трансформираше обвинението во предлог-обвинение, а судењето ќе се води по скратена постапка.

Поради оваа причина, судечкиот совет се распушти, а предметот ќе го суди судија- поединец, во овој случај, актуелната претседателка на Советот, Фанка Јанчулева Михаиловска.

Воедно, Обвинителството побара на Зеќири да му се укине мерката притвор и наместо тоа да му се определат мерки на претпазливост и тоа: појавување во суд еднаш неделно, забрана за напуштање на живеалиштето и одземање на патната исправа. Судот го прифати овој предлог.

Поранешниот генерален секретар на Владата Зеќири е обвинет за два договори што ги склучил додека бил на функцијата, со што го оштетил државниот буџет за околу 1,5 милиони евра.

Нашите вести во вашето сандаче

Секој ден во 17 ч. добивајте ги вестите од Новинската агенција Мета директно на вашата електронска адреса.

Ве молиме одберете на кој начин сакате да добивате информации од нас:
Можете да се отпишете од оваа листа преку линкот на крајот од нашите пораки.

По одлуката за повисоки плати на УКИМ и професорите на останатите јавни универзитети бараат повисоки плати

Вработените во Универзитетот во Тетово денеска излегоа на протест поради непотпишувањето на Колективниот договор од страна на Собранието за зголемување на платите како на Универзитетот „Свети Кирил и Методиј“....