Поранешниот вицепремиер Кочо Анѓушев повеќе не е почесен конзул на Малта, пренесе весникот „Тајмс оф Малта“. Оваа функција на која што беше именуван во 2021 година, му била прекината од страна на Министерството за надворешни работи на Малта, откако пред два дена Стејт департментот соопшти дека Анѓушев е генерално неподобен за влез во САД, „поради вмешаност во значителна корупција“.
„Со оглед на ваквите случувања, Министерството го прекинува неговото назначување со непосреден ефект и внимателно ги следи најновите случувања“, изјавил портпаролот на МНР во изјава за весникот.
Анѓушев пак, се огласи преку соопштение во кое вели дека тој лично го информирал министерот за надворешни работи на Малта за новонастанатата состојба и дека самиот се повлекол. Тој ѝ се заблагодари на Малта за мандатот и честа да биде почесен конзул, но како што вели, „не можам да бидам конзул со сенка врз моето име“.
„Со оглед на одлуката на почитуваниот Стејт департмент кон мене, со наводи со кои јас не се согласувам, но ги ценам и прифаќам како одлука, сметам дека не сум во можност, ниту пак Малта треба да има почесен конзул со сенка врз неговото име, колку и да е таа неоправдана. Сè додека овие наводи не се преиначат, јас не сакам и не можам да се застапувам во име на било која држава или институција. Одлуката за ограничување на влез во САД е нешто што се однесува лично на мене и со тоа прашање треба да се носам јас лично, без за тоа да имаат негативни последици пријателски држави, личности, бизнис-соработници или институции“, пишува во реакцијата на Анѓушев.
Завчера Стејт департментот го прогласи Анѓушев, како генерално неподобен за влез во САД, поради неговата вмешаност во значително висока корупција.
„Додека ја извршуваше функцијата вицепремиер, Анѓушев ја злоупотреби својата службена положба во корист на неговите приватни деловни интереси, поткопувајќи ја довербата на јавноста во Северна Македонија во нивните владини институции и јавни процеси“, се вели во известувањето од Стејт департментот.
На листата се додадени и неговата сопруга и двете деца.
Во соопштението се вели дека овој потег покажува дека „САД стојат со оние во Северна Македонија кои бараат одговорност од корумпирани јавни функционери“, а Анѓушев најави дека ќе се жали на одлуката.
