По нецели 48 часа од промоцијата, паметниот споменик на Виртуелен Прличев кој години го работев со мојот тим и поддршка на Општина Охрид беше вандализиран и онеспособен од функција, објави на својот Фејсбук профил проф. д-р Анис Сефиданис. Неговата компанија „Сефиданис“, во соработка со ученици на ОУ “Григор Прличев” Охрид, заедно работеле на овој иновативен систем. Учениците ги обезбедиле содржините, Шабан Брзев ги изработил анимациите на 3Д моделот и Стрезо Стаматовски го позајмил гласот.
Како што објави професорот Сефиданис, непознати лица го пресекле доводот до електрична енергија, го отстраниле македонското знаме и ги искорнале написите. Се обиделе да ги отворат и металните врати за да стигнат до главниот компјутер, но поради цврстиот материјал и безбедносните брави успеале само искривувања да нанесат на истите.
„Случајот беше веднаш пријавен во МВР Охрид, при што екипа направи увид и ќе ја проследи постапката до Јавното Обвинителство. Споменикот е времено надвор од функција, но активно работиме заедно со Општина Охрид на негово рестартирање како и со безбедносните служби за негова заштита од социопатите со кои за жал нашите деца го делат плоштадот“, истакна автрот.
Од СВР Охрид потврдија дека на 11.08.2022 година во 19.30 часот е пријавено насилно отстранување и одземање на 27 букви од дигиталниот споменик и на македонското знаме, лоциран на улицата „Коста Абраш“ во Охрид.
„По насока на јавен обвинител, на местото на настанот, увид извршија полициски екипи. Се преземаат мерки за расветлување на настанот по што, ќе биде поднесена соодветна пријава“, наведоа од охридката полиција.
Перенијаленот архетип на Прличев има за цел со помош на вештачката интелигенција и виртуелната реалност да го чува и одржува локалниот дијалект и охридското културно богатство, создавајќи уникатно футуристичко искуство за граѓаните и посетителите. Тој беше поставен во Долна порта во Охрид во средата.
