Францускиот претседател Франсоа Оланд порача дека неговата земја, по терористичкиот напад на сатиричниот неделен магазин „Шарли ебдо“, се наоѓа пред испит и ја повика земјата на единство.
Оланд, во обраќањето во Министерството за внатрешни работи, рече дека земјата е во шок од несфатливиот терористички акт, додавајќи дека акцијата за апсење на осомничените е во тек.
Според Оланд, земјата се нашла пред испит кога е нападнат медиум – симбол на слободата и кога се убиени полицајци кои ја претставуваат државата.
– Мораме да направиме сè за да ги заштитиме нашите граѓани – нагласи францускиот претседател, додавајќи дека постои опасност од нови напади.
Францускиот претседател ги повика граѓаните на национално единство и в недела попладне да излезат на „републикански марш“ за да им се одаде почит на жртвите на нападот.
– Сите граѓани можат да дојдат. Нема контрола, но безбедноста за време на манифестацијата мора да биде осигурана – рече Оланд.
