Покачување на платите на наставниот кадар во просек за 40 отсто и на ненаставниот кадар во просек од 15 до 50 отсто во последната една и пол година, како и континуиран пораст на платите, се дел од најважните права за кои Независниот академски синдикат (НАкС) и Синдикатот за образование, наука и култура (СОНК) рекоа дека се избориле со Колективниот договор.
На вчерашната прес-конференција, НАкС и СОНК рекоа дека по низата дезинформации во јавноста во врска со содржината и важењето на Колективниот договор, чувствувале потреба да ја известат јавноста за правата кои вработените во сите јавни високообразовни и научни установи ги стекнале со потпишувањето на договорот.
Од двата синдиката велат дека со Колективниот договор се избориле и за загарантирана исплата на минат труд од основниот буџет на Министерството за образование и наука (МОН), за утврдување на платите согласно сложеноста на работните места, поставување на праг на оптовареност за наставниот кадар во делот на наставата и проширувања на основата за покренување штрајк, вклучително и заради одбрана на автономијата.
Договорот беше потпишан на 4 мај 2021 година. Од НАкС и СОНК рекоа дека и по истекот на рокот за кој е потпишан, Колективниот договор не е завршен, односно во сила се сите негови одредби сè до потпишувањето на нов договор.
„Меѓу клучните придобивки во Колективниот договор се предвидените механизми за годишно усогласување на платата врз основа на растот на просечната плата, како и непрекинатиот континуитет во примената на сите негови одредби сѐ до потпишување на нов договор“, стои во соопштението на синдикатите.
Од таму велат дека Колективниот договор е најдоброто системско и сеопфатно решение со кое на секторот високо образование и наука му се гарантира неопходната стабилност и транспарентност во работењето.
„Во изминатиов период стана исто така јасно дека е неопходно изнаоѓање на подобри решенија за некои негови аспекти, како што се висината на коефициентите со кои се вреднува сложеноста на работните места, а кои во овој момент сѐ уште се најниски споредено со регионот, покривањето на трошоците за функционален додаток за сите факултети подеднакво, покривањето на трошоците за прекувремена работа. Особено е важно да се изнајдат подинамични решенија со кои основата за исплата на платите на вработените ќе го следи порастот на минималната плата во државата и реалните трошоци за живот“, велат од синдикатите, од каде додаваат дека очекуваат час-поскоро да започнат преговорите со МОН за нов договор.
