МОН: Регистрирани се 40 ученици и 52 наставници позитивни на ковид-19 кои оделе на настава со физичко присуство

Фото: Арбнора Мемемти

Помалку од еден процент од учениците и кадарот во основните и средните училишта се заразени со ковид-19. Согласно овие податоци, може да се заклучи дека протоколите се ефикасни во намалување на ризиците за ширење на вирусот, информираат од Министерството за образование и наука (МОН).

„Според извештаите кои училиштата секојдневно ги доставуваат до МОН, од вкупниот број 259.235 ученици на ниво на држава процентот на заразени изнесува само 0,06 отсто, а од вкупниот број 27.955 наставници и друг кадар овој процент изнесува 0,58 отсто, што е далеку под еден процент. Во рамки на наставата со физичко присуство, регистрирани се вкупно 40 ученици позитивни на корона вирусот и 52 вработени од наставниот кадар во средните и основните училишта“ соопштија од МОН.

Како што посочуваат оттаму, во сите овие случаи се реагира навремено според препораките на Центрите за јавно здравје, со што се спречува трансмисија на вирусот. Додека пак, во сите останати случаи станува збор за учесници на онлајн настава, при што ниту децата, ниту наставниците имале контакти со останатите од училиштата.

Од МОН информираат дека учениците и наставниците кои одат во изолација поради близок контакт со заразаено лице, или затоа што се позитивни на ковид-19 наставата ја продолжуваат онлајн, со што се обезбедува континуитет во образовниот процес.

Министерството за образование и наука апелира до учениците, наставниците и родителите доследно да ги почитуваат мерките и протоколите за заштита од ковид-19 во училиштата и надвор од нив, затоа што само со носење маски, држење растојание и често миење и дезинфекција на рацете може да се спречи ширењето на болеста.