Седумдесетина деца од претшколска возраст од детските градинки „Развигорче“ во Охрид и од подрачната градинка во Лескоец, денеска имаа посета и едукативен час во полициската станица за граничен надзор Охридско Езеро.
Со активностите на езерската полиција во заштита на државната граница и заштита на рибниот фонд на Охридско Езеро, како и за другите мерки и корисни информации поврзани со работата, денеска најмладите ги запозна командирот на полициската станица за граничен надзор, самостоен инспектор Миле Колески.
Командирот заедно со тимот на езерската полиција, на најмладите им покажаа и дел од опремата и материјално-техничките средства што ги користи езерската полиција.
Најмладите со виден интерес ги разгледаа полициските чамци и глисери, како и возилата и полициските мотоцикли што постојано се користат во секојдневното извршување на работните задачи.
Денешната посета на децата од детските градинки е планирана активност во рамките на проектот „Мојот пријател полицаец“.
