СЈО со секоја своја нова прес-конференција покажува дека работи повеќе како политичко, а помалку како обвинителско тело и со тоа сè повеќе ги урива очекувањата на јавноста и довербата што му беше дадена преку партиите со Договорот од Пржино, со кој што беше формирано ова обвинителство, кое требаше да биде професионална и независна институција, вели Антонио Милошоски, член на извршниот комитет на ВМРО-ДПМНЕ.
– Станува јасно дека Специјалното јавно обвинителство со низа политички настапи, надвор од секаков правен контекст, го губи кредибилитетот кај јавноста. Граѓаните треба да знаат дека театралните прес-конференции имаат само една цел, а тоа е да го компензираат недостигот од аргументи. Театралните прес-конференции на СЈО имаат, исто така, цел да му дадат изговор и повод на Заев за некакви насилни протести и испади за време на собирите на одредена група граѓани. Се разбира, настапите на СЈО се замислени да го компензираат недостигот од политичка програма и од платформа на СДСМ. Всушност, овие политички прес-конференции на обвинителството, имаат и втора цел, а тоа е да ја компензираат празнината, односно непостоењето на докази во случаите што ги работат – вели Милошоски.
Милошоски вели дека на прес-конференциите на СЈО во недостиг од посилни аргументи, присуствувале и странски амбасадори, а не ретко имале и консултации со нив за време на обработка на одредени предмети.
Од ВМРО-ДПМНЕ сметаат дека е време СЈО да ја преиспита својата работа, да ги обмисли своите настапи, да не посветува толку време на филмски прес-конференции, туку повеќе време на обвинителни акти, на процедури, на законски норми, на професионално однесување, за да може да го има кредибилитетот и основата според која е основано според Договорот од Пржино.
