Ние го поддржуваме комесарот Хан и истакнуваме дека преговорите треба да продолжат во ист формат за да се даде можност да се најде консензус за политичката криза во Македонија, изјави амбасадорката на Франција во Македонија, Лоренс Оер. Ова е прва реакција од меѓународната заедница по неуспешните преговори вчера во Брисел.
Таа, на денешната конференција на помирување, организирана од Правниот факултет при Државниот универзитет во Тетово, рече дека треба да се продолжи со реформите во насока за организирање, за да има што подобри избори кои се предвидени за наредната година.
– Преговорите вчера завршија многу доцна и беа како продолжение на договорот што беше постигнат на 2 јуни. Јас уште еднаш ќе го искажам моето мислење дека алтернативата што ја предложи комесарот Хан треба да се подржи, со тоа што политичкиот дијалог помеѓу четворицата лидери во Македонија треба да продолжи додека не се најде компромис – изјави амбасадорката Оер.
Европската унија има побарано од Македонија да исполни неколку критериуми што се однесуваат на последните настани во државата за да се изнајде легална разврска на последните случувања, додаде амбасадорката на Франција.
