Во Софија денеска беше конституирано 49-тото Народно собрание на Бугарија, на кое новоизбраните пратеници дадоа свечена заклетва. Пратениците денеска не можеа да се договорат околу изборот на собраниски спикер. Предложените кандидати на „ГЕРБ-СДС“, Росен Жељазков и на „Преродба“, Петар Петров не успеаја да соберат доволен број на пратеници за нивен избор на чело на парламентот, пишува Бугарското национално радио.
Од партијата „Продолжуваме со промената“ се залагаат за избор на парламентарен спикер по принципот на ротација на кандидати од двете најмногубројни партии, но ваквиот предлог не доби поддршка од мнозинството пратеници.
Иако партиите не можат да се договорат ниту за избор на парламентарен спикер, лидерот на „ГЕРБ“, Бојко Борисов изјави дека гледа неколку варијанти за формирање на нова бугарска влада. Откако од блокот „Продолжуваме со промената-Демократска Бугарија“ го одбија предлогот на Борисов за двете најголеми партии заедно да формираат нова влада, денеска Борисов лансираше нова варијанта за формирање влада.
Борисов предлага техничката влада предложена од претседателот Румен Радев да биде избрана како редовна од страна на пратениците во бугарскиот парламент, пишува Mediapool.bg.
„Претседателот Радев, кога има една таква тешка политичка конфронтација меѓу партиите, може да се јави како обединител, којшто претпоставувам дека сите сакаат да го видат“, изјави Бојко Борисов, додавајќи дека оние министри кои го предложиле државниот буџет, тие како парламент ќе ги задолжат да работат.
„Зошто не се согласуваат? Зошто никој не сака да работи преку парламентот“, изјави Борисов.
Инаку, бугарското собрание брои 240 пратеници, но за да се избере нова влада е неопходно мнозинство од 121 пратеник. Коалицијата „ГЕРБ-СДС“ освои најмногу пратенички места – 69, додека коалицијата „Продолжуваме со промената-Демократска Бугарија“ доби 64 пратеници во новиот состав. Партијата „Преродба“ освои 37 пратенички места, „ДПС“ има 36 пратеници, бугарските социјалисти освоија 23 пратеници и „Има таков народ“ 11 пратеници.
