Коалицијата предводена од актуелниот бугарски премиер Бојко Борисов, ГЕРБ-СДС е првата политичка сила на националните избори и изборите за Европскиот парламент што се одржаа вчера. Оваа коалиција освои 24,63 отсто од гласовите на парламентарните избори, јави БГНЕС.
Бугарската Централна изборна комисија ги соопшти резултатите од обработени 93,53 отсто од гласовите за националното собрание и 93,35 отсто од обработените гласови од изборите за Европскиот парламент.
На второ место е Движењето за право и слобода (ДПС) со 15,89 отсто од гласовите.
На трето место е „Продолжуваме со промената“ на Кирил Петков, која освои 14,81 отсто од гласовите, по што следува „Преродба“ со 14,04 отсто освоени гласови.
Бугарската социјалистичка партија освои 7,12 отсто од гласовите, а „Има таков народ“ доби поддршка од 6,1 отсто од гласачите.
Слични се резултатите и на европските избори, каде ГЕРБ-СДС ја задржа лидерската позиција со поддршка од 23,5 отсто од гласовите. На второ место е коалицијата помеѓу „Продолжуваме со промената“ и „Демократска Бугарија“, со поддршка од 14,91 отсто од гласачите, јави БГНЕС.
Ова се шести парламентарни избори во Бугарија во последните три години, среде политичката криза што ја зафати земјата.
Сепак, шансите да се состави владина коалиција помеѓу победничките партии, и сега се мали. Борисов по вчерашното гласање изјави дека не планира да формира Влада само со ДПС, додека еден од лидерите на „Продолжуваме со промената“ и поранешен премиер, Кирил Петков, на Фејсбук напиша дека се подготвени да бидат силна опозиција.
Доколку и по овие избори повторно не се формира стабилна влада, бугарскиот премиер Румен Радев најави дека е можно да формира своја партија.
