Македонскиот тенисер Калин Ивановски не успеа да се пласира во полуфиналето на најголемиот Грен слем турнир за јуниори – Вимблдон. Денеска во рамки на четвртфиналето, по два часа игра, Ивановски загуби со 2:1 во сетови 6:3, 6:7 (5) и 4:6 од Педро Роденас од Шпанија.
Четвртфиналето за Ивановски е досега негов најдобар пласман на јуниорските Грен слем турнири.
Младиот македонски тенисер мечот го започна одлично, го доби првиот сет со 6:3 и поведе со 1:0.
Во вториот сет кој траеше речиси еден час, Шпанецот Роденас поведе со 5:1 во гејмови, но Ивановски успеа да се врати во игра и да стигне до тај-брејк, во кој по водството од 5:2 на поени, го делеа два поена од полуфинале, но сепак Роденас го доби сетот со 7:6 (7:5 на поени).
Решавачкиот трет сет Роденас го доби со 6:4 и победи со 2:1 за пласман во полуфиналето.
Во борбата за пласман во големото финале Шпанецот ќе игра против Мили Пољичак од Хрватска, кој со 2:1 (1:6, 6:3 и 6:2) го елиминираше Швајцарецот Килиан Фелдбош.
