Деновиве во Хрватска би требало да профункционира тн. Музеј на лажните вести. Всушност, станува збор за веб-сајт, кој во првата фаза ќе објавува сведоштва на новинари и научници, база на податоци за лажни вести, алатки за развој на медиумска писменост и критичко размислување и препознавање и борба против „лажните вести“ (фејк њуз), јавија хрватските медиуми.
Иницијаторот на проектот на хрватскиот Музеј на лажни вести e Лордан Прелог, поранешен новинар и уредник и сегашен докторант на информатички и комуникациски науки на Филозофскиот факултет во Загреб. Тој посочува дека проектот е придонес кон глобалната борба против дезинформациите, кои се исклучително голема опасност за демократија и развој на отворените општества.
– Лично, верувам дека најефикасна борба против„ фејк њуз“ е понатамошен развој на квалитетно, одговорно и засновано на факти новинарство, истовремено зголемувајќи ја свеста на граѓаните за опасностите и ширењето на лажните вести, но и нивно поттикнување на критичко размислување и потреба од медиумско описменување особено кај младите – вели Прелог.
Проектот за „музејот“ се темели на повеќегодишната работа на Институтот за нови медиуми и електронска комуникација (InMed), кој повеќе од 20 години ја организира меѓународната конференција „Информациска технологија и новинарство“ во Интеруниверзитетскиот центар во Дубровник. Според Прелог, InMed е единствената организација во Хрватска што е член на SOMA-e (Social Observatory for Disinformation and Social Media Analysis – Социјална опсерваторија за дезинформации и анализа на социјалните медиуми), една од водечките мрежи на организации што се занимаваат со откривање на лажните вести и моделите за ниво ширење.
