„Tреба да се најде некое разумно решение односно разумен компромис. Засега, другата страна не можам да кажам дека оди во таков правец“, изјави денеска премиерот Никола Груевски.
– Мене сè уште ми стои впечатокот дека другата страна прави сè да не дојдеме до договор. Низ чекорите кои ги прават во деновите што поминуваат тие практично постапуваат колку што е можно понелогични услови за да не се договориме и да можат да го продолжат периодот на политичка криза која би имала влијание на економијата – рече Груевски.
Опозицијата, според него, на тој начин се надева дека ќе дојде до пад на економијата и шанса луѓето да почнат да се разочаруваат од ВМРО-ДПМНЕ и да гласаат за СДСМ.
– Таквата деструктивна политика која е на грбот на граѓаните и на народот, вработените и невработените кои очекуваат вработување, ќе им се врати како бумеранг на нашите политички опоненти и мислам дека следните избори ќе ги изгубат уште со поголема разлика отколку претходно поради ваквата политика со која тргнале да одат – изјави Груевски.