Припадник на Националната гарда на Масачусетс беше уапсен од ФБИ во четвртокот во врска со протекувањето на доверливи документи кои се објавени на интернет, објави државниот обвинител Мерик Гарланд, пренесе Си-ен-ен.
Апсењето на Џек Тешеира (21) доаѓа по брзата потрага од страна на американската влада за идентитетот на откривачот кој објавил доверливи документи на платформата за социјални медиуми популарна кај видео гејмерите.
Тешеира беше уапсен во Масачусетс без инциденти, рече Гарланд, и ќе биде изведен пред тамошниот федерален суд. „Оваа истрага е во тек. Ќе споделиме повеќе информации во соодветно време“, рече јавниот обвинител, одбивајќи да одговори на прашања. Според тамошното американско обвинителство, Тешеира прво ќе се појави на суд во петок во Бостон.
ФБИ во соопштението рече дека го одвеле Тешеира во притвор „во резиденција во Норт Дајтон, Масачусетс, поради неговата наводна вмешаност во објавување доверливи документи на американската влада и војска“.
„ФБИ продолжува да спроведува овластени активности за спроведување на законот во резиденцијата“, соопшти агенцијата. „Од крајот на минатата недела ФБИ агресивно ги следи истражните траги, а денешното апсење е пример за нашата континуирана посветеност да ги идентификуваме, прогонуваме и бараме одговорноста на оние кои ја изневеруваат довербата на нашата земја и ја ставаат нашата национална безбедност на ризик“.
Протечените документи објавени на социјалните мрежи, од кои некои се добиени од Си-Ен-Ен, вклучуваа детални разузнавачки проценки на сојузниците и противниците, вклучително и за состојбата на војната во Украина и предизвиците со кои се соочуваат Киев и Москва додека војната изгледа заглавена во ќор-сокак.
Според извор од американската влада запознаен со случајот Тешеира бил под надзор најмалку неколку дена пред неговото апсење од страна на ФБИ во четвртокот.
