Извор на фотографија: АД ЕСМ

Работењето на системите во рудникот Суводол на РЕК Битола е нормализирано. По обилните врнежи од дожд кои во петокот и вчера го зафатија рудникот и предизвикаа поплава, ископот на јаглен и јаловина продолжува според планираната динамика, информираат од АД Електрани на Северна Македонија (ЕСМ).

Увид во нормализирањето на состојбите денеска направи генералниот директор на АД ЕСМ, Васко Ковачевски.

„Сакам да упатам голема благодарност до сите вработени во РЕК Битола, особено вработените во рудникот Суводол за пожртвуваноста што ја покажаа изминатите два дена и натчовечките напори што ги вложија за да не трпи производството на електрична енергија. АД ЕСМ како секогаш, така и сега прави сè што може за континуирано производство од нашиот најголемиот капацитет”, изјави Ковачевски.

И покрај проблемите во работата што ги предизвикаа обилните врнежи од дожд, од АД ЕСМ информираат дека системите со рудникот Суводол не прекинале со работа ниту во петокот, ниту за време на викендот. Таму продолжуваат планираните техничко – технолошки зафати за континуиран ископ на јаглен и јаловина.