Еко-свест со порака: Да се користат хартиени кеси и платнени торби

Photo by Priscilla Du Preez on Unsplash

По бурните реакции во јавноста и денешното појаснување на министерот Насер Нуредини за укинувањето на пластичните кеси, со свој став излегоа и од Центарот за истражување и информирање за животната средина Еко-свест. Тие во целост го поддржуваат стапувањето на сила на одредбите за забрана за користење на пластични кеси за носење на стоки на пазарот, која почнува со примена од денеска.

„Ја поддржуваме одлуката да се преземат мерки за да се намали употребата на пластични кеси и очекуваме со правилно спроведување таа да има позитивно влијание врз намалувањето на отпад од пластика и микропластика. Исто така, со ваквата одлука, очекуваме да се овозможи и понатамошен развој на циркуларната економија, со што ќе се стимулира селекција на отпад кога ќе се создаде соодветна инфраструктура за тоа“, истакна Ана Чоловиќ Лешоска, извршна директорка на Еко-свест.

Сепак, ова е само првиот чекор во борбата со пластичното загадување, па очекуваме во блиска иднина да се пристапи и кон регулирање на другите производи од пластика за еднократна употреба, како цевки, чаши или прибор за јадење, велат од Еко-свест.

Истовремено, Еко-свест апелира до трговците и мрежата на супермаркети во своите продажни мрежи да стимулираат користење на хартиени кеси и платнени торби за повеќекратна употреба, а повикува и на доследно спроведување на забраната за употреба на пластика за еднократна употреба во националните паркови и заштитени подрачја, која исто така стапува на сила од денеска.

Република Северна Македонија на патот кон целосно интегрирање кон Европската Унија мора целосно да ги спроведува и европските директиви и стандарди. Употребата на досегашните пластични кеси, за кои стандардот за биоразградливост е пропишан уште во 2013 година се големи загадувачи, тешко и многу долго се разградуваат и претставуваат опасност за целиот жив свет, затоа што ние немаме резервна планета.

Министерот за животна средина и просторно планирање Насер Нуредини денеска појасни дека зголемувањето на цената на пластичните ќеси од еден на 15 денари не е со цел за да се собираат финансиски средства, туку граѓаните да се дестимулираат да употребуваат пластика.