До крајот на неделава или најдоцна до понеделник ќе почне прочистувањето на избирачкиот список, дознава „Мета“. Извори од Државната изборна комисија (ДИК) велат „подготовките се при крај и во наредните денови ќе почне проверката“.
Членовите на ДИК минатата недела усвоија одлука при вкрстеното споредување на податоци да се користат базите на 10 институции, меѓу кои Фондот за здравствено осигурување, ПИОМ, Управата за јавни приходи (УЈП), Народна банка, Агенцијата за катастар, Министреството за труд и социјална политика и други.
На 2 февруари, ДИК го усвои правилникот за методологија за целосен пристап, вршење промени и за бришење податоци во избирачкиот список.
Оттаму соопштија дека на седницата е усвоена и постапката за спроведување теренска проверка за ажурирање на избирачкиот список, како и правилникот за методологија за водење и за ажурирање на избирачкиот список, која се темели на проверки и на статистички анализи, вкрстени проверки на различни бази на податоци и евиденции, неограничени теренски проверки и други соодветни признати методи за проверка.
Според оваа методологија, избирачкиот список ќе се ревидира во неколку фази. Постапката почнува со споредба на сегашната состојба на списокот со податоците од последните избори. Во наредната фаза ќе се прави вкрстено споредување на базите на податоци од 10 институции. Во третата фаза ќе се врши теренска проверка на местата каде што податоците нема да се совпаѓаат.
