Дипломатскиот клуб Скопје ја поддржува иницијативата скопскиот аеродром да го носи името на поранешниот македонски претседател Киро Глигоров.
Од Дипломатскиот клуб велат дека со именувањето на аеродромот со името на претседателот Глигоров „на најдостоен начин ќе се материјализира оценката за неговата голема улога во процесот на создавањето на Македонија како современа држава“.
„Нагласуваме дека од скопскиот аеродром отпочнуваа и на него завршуваа бројните ‘походи’ на претседателот Глигоров во светот, неговите патувања посветени на мирот и пријателството, а за меѓународно етаблирање на македонската држава. Во негово присуство овде, прв пат, во практика се воведени протоколарните манифестации како што се веење на државното знаме, интонирање на химната, постројување на почесната гарда, со кои пред светот Република Македонија се претстави како самостојна и независна држава. Од овој аеродром полетаа и првите авиони со македонски државни ознаки“, се наведува во соопштението на Извршниот одбор на Дипломатскиот клуб.
Инаку, преименувањето на скопскиот аеродром, кој сега го носи името „Александар Велики“ и на автопатот со истото име во јавноста се почесто се поврзуваат со новата клима во македонско-грчките односи и интензивирањето на преговорите меѓу двете држави за решавање на спорот за името.
Дипломатскиот клуб Скопје, како што стои на нивната интернет страница, е „невладина, доброволна, професионална и непрофитна организација на граѓани во Република Македонија со цел, како активни или поранешни дипломати, да се здружуваат за да работат за општото добро и интересите на Република Македонија и на држави чии дипломатии се залагаат за демократски и современи меѓународни односи“.
