По повод Денот на народното востание и антифашистичката борба, 11 Октомври, денеска попладне ќе се одржи граѓански марш под мотото „Борбата продолжува, гласот победува“.
Иницијатори на граѓанскиот марш, кој ќе почне во 14 часот, се лидерот на СДСМ, Зоран Заев, новинарите Томислав Кежаровски и Атанас Костовски, активистот Влатко Васиљ, актерката Ирена Ристиќ, музичарите Златко Ориѓански и Бени Шакири и припадничката на Сојузот на борци, Вера Бунтеска.
Маршот ќе почне од раскрсницата на булеварот Партизански одреди и улицата Франклин Рузвелт, во близина на новиот објект на Специјалното јавно обвинителство, а ќе продолжи по булеварот Партизански одреди до зградата „Тифани“, од каде преку улицата Димитрие Чупоски ќе заврши пред Собранието на Република Македонија.
Пред Законодавниот дом ќе има поставено бина и на граѓаните ќе им се обратат четворица говорници, меѓу кои и лидерот на СДСМ, Зоран Заев.
Со маршот, како што претходно соопштија организаторите, ќе се одбележи Денот на востанието во Македонија и ќе се испрати слободарска порака.
„Ќе маршираме за борба против сиромаштијата, за повисоки плати, за работни места, за млади кои сакаат да останат да живеат во родната земја. Да застанеме рамо до рамо сите заедно, еднакво важни, независно од каква било различност“, велат организаторите.
