Неколку крајезерски месни заедници, еколошки здруженија и манастирот „Св. Наум“ на Дебарско-кичевската епархија на МПЦ, изработија Декларација за зачувување на светското природно и културно наследство на Охрид, во областите со висока еколошка вредност од меѓународен карактер, признаен од УНЕСКО и од суштинско значење и приоритет за Република Македонија.
Декларацијата е иницирна од месната заедница Лагадин, Еколошкото друштво „Лагадин“ и од Еколошкото здружение на граѓани „Фронт 21/42“, а на неа се потпишани месните заедници на Љубаништа, Пештани, Лагадин, Рача, Коњско, Далјан/Воска и манастирот „Св. Наум“ на Дебарско-кичевската епархија на МПЦ. Декларацијата е испратена до сите носители на одлуки поврзани со заштитата на светското културно и природно наследство на Охрид.
„Цврсто веруваме дека како надлежни институции не сакате да учествувате во деградирање на ова исклучително значајно богатство, кое е под заштита на УНЕСКО. Апелираме до Вас да ги стопирате предложените измени на планот за управување со Националниот парк „Галичица“ и со урбанистичките планови на Охрид, како и одредени одлуки за урбанизација и да се повлечете од спроведувањето на овие проекти“, стои во декларацијата потпишана од месните заедници.
Потписниците сметаат дека Охридско Езеро и Националниот парк „Галичица“, кои се дел од светското природно и културно наследство признаени од УНЕСКО, се загрозени од проекти со кои се предвидува изградба на експресен пат, голем туристички скијачки комплекс и несоодветна и штетна урбанизациија на голем дел од крајбрежјето и од градот Охрид.
Предложените измени во планот за управување со Националниот парк „Галичица“, измените на урбанистичките планови на Охрид, како и други одлуки за урбанизација, за овозможување на реализацијата на овие проекти, претставуваат сериозна закана за одржување на биодиверзитетот и природната изворност на Охридско Езеро и на Националниот парк „Галичица“ и го доведуваат во прашање нивниот статус на светско наследство. Заканата е потврдена дури и со извештаите за стратегиска оцена на влијанието врз животната средина за овие планови, каде во дури 80 проценти од заклучоците се вели дека негативното влијание врз биодиверзитетот, почвата и водите ќе биде неповратно, т.е. нема да може да се преземат никакви корективни мерки, тврдат претставниците на месните заедници, Црквата и на еколошките здруженија од Охрид.