Во Зоолошката градина во Скопје вчера била извршена евтаназија на азиската слоница Дуња.
Од ЗОО Скопје соопштија дека одлуката за евтаназија била донесена по насока на сопствениците кои ја позајмија слоницата на нашата зоолошка – „Pairi Daiza“ од Белгија, заедно со тим експерти – ветеринар, офтамолог и сениор зоо негувател на тимот за слонови, кои ја прегледувале слоницата.
Во објава на Фејсбук од зоолошката градина потенцираат дека никаков вид на третман немало да ѝ помогне на слоницата. Тврдат дека имала симптоми на длабока старост и изнемоштеност, и дека биле констатирани повеќе здравствени проблеми кај Дуња, типични за шеесетгодишна слоница.
Дуња најголем дел од својот живот го поминала во шведски патувачки циркус, патувајќи низ цела Европа.
По забраната за користење на животни во циркуси точки, Дуња патува во Белгија, во еден од најубавите паркови за слонови во светот- „Pairi Daiza”, каде се констатира дека, за жал, поради трауматичното минато, нема да можат да живее во социјална група со други слонови, па во 2018 година е донесена во Скопје.
